Breski leikarinn Tim Curry er látinn, 80 ára að aldri. Curry, sem var einna þekktastur fyrir hlutverk sitt sem Dr. Frank-N-Furter í söngvamyndinni The Rocky Horror Picture Show, lést á heimili sínu í Los Angeles.
Bandaríski slúðurmiðillinn TMZ greindi frá andlátinu á miðvikudag og vísaði til heimildarmanna. Curry hafði glímt við heilsubrest um árabil eftir að hafa fengið alvarlegt heilablóðfall fyrir rúmum áratug.
Curry hóf leiklistarferil sinn á sviði í West End-leikhúshverfinu í London. Þar lék hann fyrst Dr. Frank-N-Furter, sérkennilegan vísindamann sem varð síðar eitt þekktasta hlutverk hans. Hann endurtók hlutverkið í kvikmyndinni The Rocky Horror Picture Show árið 1975.
Myndin naut ekki mikillar velgengni þegar hún kom fyrst út en öðlaðist síðar gríðarlega sterkan aðdáendahóp. Hún hefur um áratugaskeið verið sýnd á sérstökum miðnætursýningum víða um heim og er Curry órjúfanlega tengdur arfleifð hennar.
Á löngum ferli kom Curry fram í fjölmörgum kvikmyndum og sjónvarpsverkefnum. Hann vakti meðal annars mikla athygli fyrir túlkun sína á hinum óhugnanlega trúði Pennywise í sjónvarpsþáttaröðinni It árið 1990, sem byggð var á samnefndri skáldsögu Stephen King.
Þá lék Curry meðal annars í kvikmyndunum Home Alone 2, Annie, Clue og Charlie’s Angels. Auk kvikmynda- og sjónvarpsleikja starfaði hann mikið á sviði og við raddleik á áratugalöngum ferli.
