Donald Trump Bandaríkjaforseti fyrirskipaði í kvöld loftárásir á þrjá staði í Íran. Eftir árásirnar sagði hann að Íranir "yrðu nú að samþykkja að enda þetta stríð", sem hófst með loftárásum Ísraela.
Trump hafði gefið Írönum tveggja vikna frest í þessari viku, en lét frestinn ekki renna út. Eftir að Evrópuþjóðir hófu tilraunir til að miðla málum hélt Trump því fram að Íranir vildu ræða við Bandaríkin, en ekki Evrópu.
Donald Trump tilkynnti eftir árásirnar að hann myndi ávarpa þjóðina klukkan 22:00 að austurstrandarstaðartíma frá Hvíta húsinu, í kjölfar þess sem hann kallaði „mjög árangursríka hernaðaraðgerð“ sem beindist gegn kjarnorkumannvirkjum Írans.
„Ég mun ávarpa þjóðina klukkan 22:00 frá Hvíta húsinu vegna mjög árangursríkrar hernaðaraðgerðar okkar í Íran. ÞETTA ER SÖGULEGUR VIÐBURÐUR FYRIR BANDARÍKIN, ÍSRAEL OG HEIMINN. ÍRAN VERÐUR NÚ AÐ FALLEST Á AÐ LJÚKA ÞESSU STRÍÐI. ÞAKKA YKKUR!“ skrifaði Trump í færslu á Truth Social.
Forseti hafði áður tilkynnt að Bandaríkin hefðu framkvæmt „mjög árangursríka árás“ á kjarnorkustöðvar í Íran, þar á meðal í Fordow, Natanz og Isfahan.
Trump endurbirti einnig færslu á samfélagsmiðlum þar sem stóð: „FORDOW ER HORFIÐ.“
Bandaríkjamenn hafa ekki áður gert loftárásir á Íran eða stundað þar landhernað. Sömuleiðis er um að ræða fyrsta beina stríð milli Ísraels og Íran.
Árið 1988 réðust bandarískar hersveitir á íranska flotann og sökktu eða skemmdu hluta hans verulega, í hefndarskyni eftir að bandarískt herskip hafði lent á írönsku tundurdufli.
Sama ár skaut bandaríska herskipið USS Vincennes fyrir slysni niður íranska farþegaþotu, flug Iran Air 655, með þeim afleiðingum að 290 óbreyttir borgarar létust. Þó að um hafi verið að ræða slys, var það bein hernaðaraðgerð sem olli miklum harmi.
Árið 2020, í fyrri forsetatíð Trumps, gerðu Bandaríkin árás á hershöfðingjann Qasem Soleimani, yfirmann al-Quds-sveita Írans, nálægt flugvellinum í Bagdad í Írak.
Ákvörðun Trumps er því söguleg, eins og hann segir sjálfur frá.
Trump hefur bæði lofað því að halda Bandaríkjunum frá stríðum og stöðva kjarnorkuvopnagerð Írana.
Þingmaður Repúblikanaflokksins, Thomas Massie, sem hefur verið leiðandi í umræðum um að takmarka heimild Trump til að ráðast á Íran án samþykkis þingsins, segir árásirnar brjóta í bága við stjórnarskrá Bandaríkjanna, sem veitir þinginu vald yfir ákvörðunum um stríð.
Samkvæmt heimildum New York Times voru Íranir í stakk búnir að ráðast á bandarískar herstöðvar í Miðausturlöndum ef til árása kæmi, en 40 þúsund bandarískir hermenn eru á svæðinu.
