Donald Trump Bandaríkjaforseti hefur nú gefið í skyn að hann hafi áhuga á stjórnarskiptum í Íran, það sem hann kallar að gera Íran stórfenglegt á ný, eða MIGA.

Þetta segir hann nú þrátt fyrir að nokkrir embættismenn í stjórn hans hefðu áður lagt áherslu á að loftárásir Bandaríkjanna á kjarnorkustöðvar Írans hefðu ekki það markmið.

„Það er ekki pólitískt rétt að nota hugtakið „stjórnarskipti“, en ef núverandi stjórn í Íran getur ekki GERT ÍRAN AFTUR FRÁBÆRT, af hverju ættu þá ekki að eiga sér stað stjórnarskipti??? MIGA!!!“ skrifaði Trump á samfélagsmiðil sinn, Truth Social.

Ayatollah Kahmeinei leiðir klerkastjórnina sem hefur verið við völd í Íran frá byltingunni árið 1979. Hann er nú 87 ára gamall.

Það yrði ekki í fyrsta sinn sem Bandaríkin framkölluðu stjórnarskipti í Íran, en árið 1953 ýttu bandaríska leyniþjónustan CIA og breska leyniþjónustan MI6 undir valdarán sem steypti lýðræðislega kjörnum forsætisráðherra af stóli, Mohammad Mossadegh, og komu keisara aftur til valda, eftir að Íranar höfðu sýnt viðleitni til að nýta náttúruauðlindir sínar í eigin þágu í auknum mæli.