Baðstrandagestir á Cala del Barco-ströndinni í Cartagena urðu vitni að því þegar hraðbátur sigldi beint upp að ströndinni um miðjan dag á miðvikudag. Spænska almannavarnarliðið (Civil Guard) handtók alls 62 einstaklinga eftir umfangsmikla leit á svæðinu.
Myndbönd af atvikinu hafa farið eins og eldur um sinu á samfélagsmiðlum. Á þeim sést hvar fjöldi fólks stendur upp úr bátnum og hleypur í land á meðan undrandi og skelfdir ferðamenn fylgjast með. Skömmu eftir að fólkið stökk frá borði sneru smyglararnir bátnum við á miklum hraða og flúðu aftur á haf út.
15 ólögráða drengir í hópnum
Samkvæmt opinberum tölum spænskra yfirvalda samanstóð hópurinn af 45 fullorðnum karlmönnum, tveimur konum og 15 ólögráða drengjum. Flestir þeirra eru taldir vera frá Alsír.
Fulltrúar Rauða krossins mættu á svæðið til að veita hópnum fyrstu aðstoð og mat, en allir reyndust við ágæta heilsu. Fólkið var í kjölfarið flutt í hendur ríkislögreglunnar (National Police) sem fer með útlendingamál á svæðinu og mun fylgja málinu eftir í samræmi við spænsk lög.
Kallað eftir tafarlausum aðgerðum stjórnvalda
Atvikið hefur hrundið af stað harðri pólitískri umræðu á Spáni um landamæraeftirlit. Báturinn sem notaður var er af gerðinni sem smyglarar kalla gjarnan „VIP-leigubíla“ vegna þess hve fljótir þeir eru að sigla yfir Miðjarðarhafið frá Norður-Afríku.
Noelia Arroyo, bæjarstjóri Cartagena, brást hart við atburðinum og krafðist þess að spænska ríkisstjórnin gripi strax til aðgerða. Hún sagði ólíðandi að smyglarar gætu siglt óáreittir upp að spænskri strönd um hábjartan dag og kallaði eftir auknu fjármagni, betri tækjabúnaði og fleiri lögreglumönnum til að gæta landamæranna í Murcia-héraði.
