Gervigreindaröryggiskerfi í Baltimore taldi sig hafa greint ungling með skotvopn og lét lögregluna þegar í stað vita. Í ljós kom þó að drengurinn hélt á Doritos snakkpoka, ekki byssu.

Ný upptaka úr búkmyndavél frá Kenwood-menntaskólanum í Baltimore-sýslu í Maryland sýnir atvikið þar sem Taki Allen, 16 ára nemandi, er handjárnaður og á honum leitað eftir að gervigreindarkerfi sem á að greina byssur taldi hann bera slíkt vopn.

Eftir leit fann lögreglan enga byssu og einn lögreglumaðurinn á upptökunni reynir að útskýra málið með því að kerfið hafi sent tilkynningu „vegna þess hvernig þið voruð að borða snakkið, Doritos eða eitthvað, það greindi það sem byssu.“

Skólinn notar kerfi sem heitir Omnilert, tæknibúnað sem notar myndavélar skólans til að greina hluti sem líkjast vopnum og lætur síðan öryggisstarfsfólk og lögreglu vita.

Allen ræddi við fréttastöðina WBAL-TV 11 News og sagði að hann hefði haldið um snakkpokann með báðum höndum en haft einn fingur út þegar kerfið flaggaði hann, óljóst er hvort Omnilert taldi fingurinn vera byssu.

Talsmaður lögreglunnar í Baltimore-sýslu segir: „Lögreglumennirnir brugðust við af hæfilegri varfærni í samræmi við þær upplýsingar sem þeir höfðu. Málinu var lokið á öruggan hátt þegar í ljós kom að engin hætta var á ferðum.“