32 ára gamall maður lést eftir að hafa verið dreginn meðvitundarlaus úr sjónum við La Tejita-ströndina á suðurhluta Tenerife síðdegis í gær en spænskir fjölmiðlar greina frá málinu

Neyðar- og öryggismiðstöð Kanaríeyja fékk nokkrar tilkynningar um atvikið skömmu fyrir klukkan 14 að staðartíma. Tilkynnt var að sundmaður hefði verið dreginn meðvitundarlaus úr sjónum við ströndina, sem er í sveitarfélaginu Granadilla de Abona.

Viðbragðsaðilar og sjúkraflutningamenn voru þegar sendir á vettvang. Þegar þeir komu á staðinn var maðurinn í hjarta- og öndunarstoppi og hófust þegar umfangsmiklar endurlífgunartilraunir.

Hjartastuðtæki var notað í tilraun til að koma hjarta mannsins aftur af stað. Þrátt fyrir ítrekaðar tilraunir tókst ekki að bjarga lífi hans og var hann úrskurðaður látinn á vettvangi.

Ekki hefur komið fram hvað varð til þess að maðurinn lenti í erfiðleikum í sjónum eða hversu lengi hann hafði verið í vatninu áður en honum var komið á land.

La Tejita er ein þekktasta náttúrulega ströndin á suðurhluta Tenerife. Hún er skammt frá bænum El Médano og við Montaña Roja á suðausturströnd eyjarinnar.

Ströndin er vinsæl meðal bæði heimamanna og ferðamanna og er fjölsótt yfir sumarmánuðina.