Héraðsdómur Austurlands hefur dæmt ónafngreindan mann í 30 daga skilorðsbundið fangelsi fyrir að hrækja í andlit lögreglumanns sem var við skyldustörf aðfaranótt sunnudags árið 2023. Refsingin fellur niður að liðnu einu ári haldi maðurinn almennt skilorð.

Samkvæmt dómnum var maðurinn ákærður fyrir brot gegn valdstjórn með því að hafa hrækt í andlit lögreglumanns fyrir utan tiltekinn stað. Í upphafi neitaði hann sök þegar málið var þingfest í mars á þessu ári og var því stefnt að aðalmeðferð.

Skömmu áður en aðalmeðferð átti að fara fram breytti maðurinn hins vegar afstöðu sinni og játaði brotið skýlaust. Vegna játningarinnar var málið dæmt án aðalmeðferðar samkvæmt ákvæðum laga um meðferð sakamála.

Við ákvörðun refsingar leit dómurinn meðal annars til þess að maðurinn var ungur þegar brotið var framið, nokkur tími væri liðinn frá atvikinu og tafir yrðu honum aðeins að takmörkuðu leyti kenndar. Þá lá ekki fyrir að lögreglumaðurinn hefði orðið fyrir líkamlegum skaða vegna háttseminnar og maðurinn hefði að lokum gengist greiðlega við broti sínu.

Dómurinn taldi því hæfilegt að dæma manninn í 30 daga fangelsi en fresta fullnustu refsingarinnar. Hann þarf að halda almennt skilorð í eitt ár frá uppkvaðningu dómsins.

Maðurinn var jafnframt dæmdur til að greiða 450.324 krónur í þóknun verjanda síns.