Fjölmiðlakonanan Snærós Sindradóttir - dóttir Helgu Völu Helgadóttur lögfræðings og fyrrverandi þingkonu - er orðin verulega leið á því að heyra af því hér og þar að móðir hennar hafi fjárhagslegan hag af því að hingað til Íslands komi hælisleitendur.
Hún skrifar pistil á Facebook-síðu sína þar sem meðal annars segir að „ein þrálátasta lygin sem vellur upp út rasistum landsins er sú að mamma mín hafi beinan fjárhagslegan hag af því að til Íslands komi hælisleitendur. Það líður ekki sá dagur að ég lesi ekki komment um þetta kjaftæði, og nýverið þurfti ég að leiðrétta bullið þegar það kom upp í fjölskylduspjalli vinkonu minnar.“
Hún segist hafa þagað þunnu hljóði í langan tíma, en nú sé nóg komið:
„Starfa míns og hennar vegna þagði ég í sex ár þegar þessari drullu var haldið fram en nú þegar tengdasonur fyrrverandi forsætisráðherra heldur lyginni áfram ætla ég að leiðrétta hana í eitt skipti fyrir öll.“
Og hér er leiðréttingin:
„Fyrir meira en áratug síðan tók mamma mín að sér lögmannsstörf fyrir fólk sem hingað sótti vernd eftir styrjöld í Sýrlandi. Þannig var kerfið þá og tugir lögmanna sinntu því sama. Það var sannarlega ekki mokgróði í þeim verkefnum en það er hlutverk lögmanna að taka að sér störf fyrir fólk sem á rétt á aðstoð skv. íslenskum lögum. Árið 2014 gerði ríkisstjórn Sigmundar Davíðs og Bjarna Benediktssonar hins vegar breytingar á hæliskerfinu sem fólu í sér að öll þjónusta lögmanna var færð til Rauða kross Íslands. Þar með var þessum verkefnum móður minnar lokið. Fyrir þau sem kunna ekki að reikna þýðir það að í 11 ár hefur þetta ekki verið vinnan hennar.“
Snærós færir í tal að „árið 2017 var mamma mín svo kjörin á þing og lagði inn lögmannsréttindi sín á meðan. Annað en sumir. Þar sat hún í sex ár, öflugust og kraftmest allra þingmanna, þar til hún ákvað að snúa aftur til lögmannsstarfa og finna næringuna í því að hjálpa fólki augliti til auglitis frekar en í gegnum svifaseint kerfi þar sem gera þarf málamiðlanir við fólk sem hefur enga mannúð í hjarta sér. Þingmenn þjóðarinnar sem aldrei hafa hitt neinn sem ekki er af þeirra eigin sauðahúsi. Mamma mín er duglegasta kona sem ég þekki. Hún er gríðarlega hörð af sér en þeirri ásjónu fylgir því miður að fólki finnst það ekki þurfa að standa upp fyrir henni. Þannig hefur samstarfsfólk í pólitík aldrei lyft litla fingri til að leiðrétta bullið og þvættinginn sem á henni hefur dunið frá sniðmenginu sem hatar útlendinga og heldur að bólusetningar séu massastjórnunartæki stjórnvalda. Nú eru hins vegar tvö ár síðan hún sagði skilið við störf sín í þágu þjóðarinnar og varð einstaklingur á ný.“
Snærós er að endingu með skilaboð til fyrrverandi forsætisráðherra Íslands, Bjarna Benediktssonar varðandi tengdason hans, Brynjar Barkarson, sem hélt ræðu gegn útlendingastefnu yfirvalda á laugardaginn var:
„Enn lætur þetta fólk þó, sem hefur ekki uppfært þekkingu sína á íslensku regluverki í meira en áratug, eins og á henni megi berja líkt og um kjörinn fulltrúa sé að ræða og enn taka vinir hennar sem vita betur ekki upp hanskann fyrir hana. Það gerum við fjölskyldan þá bara og verður ekki lengur setið hjá í þeim efnum. Við Bjarna Benediktsson vil ég segja: Settu tappa í tengdasoninn. Hann er að sverta ímynd fjölskyldu þinnar og verða ykkur til stórfelldrar skammar.“
