Vigdís Finnbogadóttir, fyrrverandi forseti Íslands, tekur þátt í haustsöfnun Barnaheilla – Save the Children á Íslandi með sérstökum spilastokki sem ber nafn hennar.
Vigdís tók á móti svokölluðum Vigdísarstokki úr hendi Tótlu I. Sæmundsdóttur, framkvæmdastjóra Barnaheilla. Spilastokkurinn var unninn í samstarfi við Rán Flygenring og prýða hann myndir úr verki hennar Vigdís: Bókin um fyrsta konuforsetann.
„Ég er stolt að taka þátt í þessu verkefni með Barnaheillum, öllum börnum til heilla,“ sagði Vigdís þegar hún tók við stokknum.
Allur ágóði af sölu Vigdísarstokksins rennur til alþjóðlegra verkefna Barnaheilla í Síerra Leóne, Madagaskar, Tansaníu og Írak. Þar vinna samtökin að verkefnum sem ætlað er að styðja börn sem búa við meðal annars stríð, ofbeldi, fátækt og takmarkað aðgengi að menntun.
Vigdís á sér langa sögu með Barnaheillum hér á landi. Hún tók þátt í stofnun samtakanna árið 1989, nafn þeirra er úr hennar smiðju og hefur hún verið verndari þeirra frá upphafi.
Með útgáfu spilastokksins vilja Barnaheill jafnframt heiðra framlag Vigdísar og þau gildi sem hún hefur lagt áherslu á í gegnum tíðina, meðal annars jafnrétti, sjálfbærni, menntun og virðingu fyrir öllum börnum.
Vigdísarstokkurinn verður seldur á vef Barnaheilla auk þess sem hann fæst í fjölmörgum verslunum á höfuðborgarsvæðinu. Þá mun sölufólk víða um land ganga í hús og bjóða stokkinn til sölu.
