Ferðamaður slasaðist alvarlega þegar æstur vísundatarfur réðst á hann á tjaldsvæði í Yellowstone-þjóðgarðinum í Wyoming í Bandaríkjunum á föstudag. Atvikið náðist á myndband en ljósmyndari sem varð vitni að árásinni sagði dýrið hafa verið „æst og brjálað“ og hafi „ráðist á allt sem á vegi þess varð“.
Vísundurinn, sem vegur um 900 kíló, réðst á manninn þegar hann var á göngu með barnabarni sínu um Bridge Bay-tjaldsvæðið, sunnan við Fishing Bridge. Þjóðgarðsyfirvöld hafa ekki birt frekari upplýsingar um árásina.
Atvikið var hins vegar lýst ítarlega af atvinnuljósmyndaranum Mike MacLeod frá Bozeman í Montana, sem var á tjaldsvæðinu ásamt eiginkonu sinni þegar hún tók fyrst eftir vísundinum. Hann afhenti einnig myndskeið af árásinni til Cowboy State Daily.
MacLeod sagðist upphaflega aðeins hafa ætlað að mynda dýrið þar sem það virtist órólegt.
„Ég var bara að reyna að ná dramatískum myndum af vísundinum þegar hann var í æsingi. Þetta breytti algjörlega hugmynd minni um hvernig þeir haga sér á þessum árstíma,“ sagði hann.
Að sögn MacLeod gekk vísundurinn um tjaldsvæðið og nálgaðist hóp barna sem voru að taka myndir úr öruggri fjarlægð áður en hann hljóp skyndilega í átt að þeim.
Dýrið hélt síðan áfram um svæðið á meðan tjaldgestir kölluðu hver til annars og vöruðu við hættunni. Skömmu síðar kom afi barnsins gangandi eftir vegi þar sem vísundurinn lá í rykinu.
Á myndbandinu sést afi og barnabarn hans taka upp farsíma sína og mynda dýrið úr talsverðri fjarlægð. Þegar vísundurinn reis á fætur ákvað afi drengsins að yfirgefa svæðið og þau færðu sig á bak við tré.
Skömmu síðar varð pallbíll á vegi dýrsins. Vísundurinn hljóp að bílnum með þeim afleiðingum að ökumaðurinn ók hratt á brott. Eftir það sneri dýrið sér að staðnum þar sem afi og barnabarn hans höfðu leitað skjóls.
Drengnum tókst að komast undan en vísundurinn elti afa hans í kringum tré, krækti í mjöðm hans með vinstra horninu og kastaði honum um 2,5 metra upp í loftið.
„Hann tók fullkomna veltu í loftinu og lenti á hliðinni. Vísundurinn var að minnsta kosti 1,8 metra hár og maðurinn var nokkra metra fyrir ofan hann,“ sagði MacLeod.
Hann sagðist hafa hætt að taka upp þegar hann óttaðist að dýrið myndi stanga manninn aftur.
„Ég hljóp að vísundinum, öskraði eins hátt og ég gat og reyndi að líta út fyrir að vera stór og ógnandi.“
Fleiri nærstaddir gerðu slíkt hið sama og þá hljóp vísundurinn á brott.
Samkvæmt MacLeod sagði barnabarn hins slasaða að afi hans hefði hlotið alvarlega áverka og væri enn ekki úr hættu.
Þjóðgarðsyfirvöld minna á að öll villt dýr í Yellowstone geti verið hættuleg, jafnvel þótt þau virðist róleg. Gestir eru hvattir til að halda að minnsta kosti 90 metra fjarlægð frá björnum, úlfum og púmum og minnst 23 metra fjarlægð frá öðrum dýrum, þar á meðal vísundum og elgum.
MacLeod sagði þó að maðurinn sem varð fyrir árásinni hefði virt allar öryggisleiðbeiningar.
„Ég sá engan fara of nálægt. Fólk var að vara hvert annað við og hélt virðingarfullri fjarlægð,“ sagði hann.
Árásin átti sér stað á fengitíma vísunda, þegar tarfarnir verða árásargjarnari í baráttunni um kvendýr.
Þetta er önnur árás vísunds á mann í Yellowstone á þessu ári. Sú fyrri varð 26. júní þegar tólf ára barn slasaðist nærri Mud Volcano-svæðinu. Málið er enn til rannsóknar.
