Sigmundur Davíð Gunnlaugsson, formaður Miðflokkurinn, rifjar upp söguleg tengsl Vestur-Íslendinga við íshokkí á Ólympíuleikum í færslu á samfélagsmiðlinum X, í kjölfar úrslitaleiks karla þar sem Bandaríkin sigruðu Kanada.
„Í dag tapaði Kanada fyrir Bandaríkjunum í úrslitaleik íshokkíkeppni karla á Ólympíuleikunum. Það var fyrsti sigur Bandaríkjanna frá því þeir unnu Sóvíetríkin í sögufrægum leik árið 1980,“ skrifar Sigmundur.
Hann bendir jafnframt á að Kanada hafi lengst af verið sigursælasta þjóðin í greininni. „Kanada hefur unnið oftast allra og sigraði fyrstu íshokkíkeppni Ólympíuleikanna árið 1920 með fræknu liði Vestur Íslendinga,“ segir hann og vísar þar í lið íslenskra innflytjenda í Kanada.
Innflytjendaliðið Winnipeg Falcons keppti fyrir hönd Kanada. „Þá kepptu Fálkarnir (Winnipeg Falcons) fyrir Kanada. Liðið var stofnað af Íslendingum þar í landi og að öllu leyti skipað Íslendingum að frátöldum einum „Englendingi“,“ skrifar hann og bætir við að þannig tali sumir Vestur-Íslendingar enn um aðra þjóðflokka.
Sigmundur segir söguna vel þekkta meðal Vestur-Íslendinga. „Allir sem hafa heimsótt Vestur Íslendinga þekkja þessa sögu. Þar er minning liðsins enn í hávegum höfð og við ættum að gera það líka, m.a. með því að styðja við íshokkí á Íslandi,“ skrifar hann.
Hann nefnir jafnframt að í merki íslenska íshokkílandsliðsins sé vísun í þennan arf. „Í merki íslenska landsliðsins má sjá skemmtilega tilvísun í þetta fræga lið, lítið hlynslauf (tákn Kanada), til minningar um hinn frækna sigur Fálkanna,“ segir hann.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
































Athugasemdir