„Miðaldra, hvítur, kristinn karlmaður, helst reffilegur og peningalegur, er formaður. Glæsilegasta konan er varaformaður og sætasti krakkinn ritari. Þetta er afleiðing af valdatilfærslu prófkjöranna.“
Ragnar Önundarson, fyrrverandi bankastjóri, setur út á flokksforystu Sjálfstæðisflokksins, Bjarna Benediktsson, Þórdísi Kolbrúnu Reykfjörð Gylfadóttur og Áslaugu Örnu Sigurbjörnsdóttur.
„Það er alveg ljóst að Ragnar Ön hefur einhvern óeðlilegan áhuga á að gramsa í myndum á fb hjá mér.“
Áslaug Arna Sigurbjörnsdóttir, ritari Sjálfstæðisflokksins.
„Mér finnst þessi ummæli ömurleg en lýsa því kannski ágætlega hvað við er að eiga þegar kemur að baráttunni fyrir jafnrétti og meira frjálslyndi.“
Logi Einarsson, formaður Samfylkingar, kemur flokksforystu Sjálfstæðisflokksins til varnar.
„Það eru c.a. átján mánuðir síðan þér tókst að koma þér í alla fjölmiðla Ragnar, fyrir að velta fyrir þér á þessum vettvangi útliti og ljósmyndum Áslaugar Örnu. Er það virkilega leiðangur sem þú vilt endurtaka?“
Stefán Pálsson sagnfræðingur.
„Enginn lítur á Ísland sem ESB-umsóknarríki nema ef til vill einhverjir í SDG-aðdáendahópnum.“
Björn Bjarnason, fyrrverandi dómsmálaráðherra og þingmaður.
„Ég neita því ekki að ég hrökk svolítið í kút.“
Magnúsi Geir Þórðarsyni útvarpsstjóra brá þegar Hatarar veifuðu palestínsku borðunum í Eurovision-keppninni.
„Ef áætlunin var alltaf sú að sniðganga keppnina í Hollandi að ári, misbjóða og móðga almenning, minnka traust skattgreiðenda á þessari ríkisreknu stofnun allra landsmanna og vera Íslandi til skammar – þá virðist allt enn vera samkvæmt áætlun.“
Fjölmiðlamaðurinn Ívar Halldórsson skammast út í útvarpsstjóra fyrir að hafa ekki hlustað á sig og bannað Hatara.
„Ég get ekki annað en litið á leikþátt Hatara sem ekkert annað en enn eina tilraunina til þess að taka fram fyrir hendur Palestínumanna og velja hvenær og hvernig þau mega og eiga að mótmæla.“
Bryndís Silja Pálmadóttir, varaformaður Félagsins Ísland-Palestína.
Athugasemdir