Setningarnar máttu hvorki vera flóknar né of langar

Nýlega kom bókin Nýjar slóðir út. Bókin er skrifuð fyrir fólk af erlendum upp­runa sem er búið að læra grunn­inn í íslensku. Höfundur bók­ar­innar, Kristín Guð­munds­dóttir, segir skort hafa verið á bókum sem þessum fyrir full­orðna.

Nýjar slóðir inni­heldur 12 sjálf­stæðar létt­lestr­ar­sögur af ýmsu tagi. „Sögurnar koma inn á íslenska mál­fræði, sögu, menn­ingu og fleira sem við kemur okkar sam­fé­lagi,“ segir hún.

Hug­myndin að bók­inni kvikn­aði þegar spænsk vin­kona Krist­ínar, Becky, sagði Kristínu að það vant­aði létt­lestr­ar­bækur á mark­að­inn fyrir fólk sem hefur lært íslensku. Kristín ákvað að stökkva á tæki­færið og skrifa bók fyrir þennan hóp. „Fram til þessa hefur þessi mark­hópur verið óplægður akur og er þess virði að vekja athygli á.“

Spurð út í hvernig það hafi verið að skrifa bók­ina segir Kristín það hafa verið bæði gaman og áhuga­vert. „Maður verður að passa sig á að hafa setn­ing­arnar hvorki of flóknar né of langar. Ég reyndi að hafa sög­urnar fjöl­breyttar og skrif­aðar þannig að þær myndu vekja áhuga fólks. Svo flétt­aði ég sögu Íslands inn í eina og eina sögu enda hef ég áhuga á sögu og menn­ingu,“ segir Kristín. Hún bætir við: „Vonandi hjálpar bókin ein­hverjum þarna úti.“

Kristín sýndi Becky vin­konu sinni bók­ina áður en hún kom út og bað um álit. „Ég bar bók­ina undir Becky og börnin hennar áður en ég gaf hana út. Þau voru mjög ánægð og hvöttu mig áfram. Það gaf mér byr undir báða vængi að halda áfram.“

Kristín bendir á að áhuga­samir geti sent henni tölvu­póst hafi fólk áhuga á að kaupa bók­ina, á net­fangið [email protected]. „Bókasafn Reykja­nes­bæjar og Kópavogs eru þegar búin að kaupa hana af mér. Bókin er líka komin á Storytel.is, það var gert svo fólk gæti hlustað á hana með það las. Svo fólk heyri hvernig orðin eru borin fram.“