Þrjár vinkonur sem fyrir nokkrum árum tóku þátt í að koma á umhverfisátakinu Plastlaus september tóku sig til og opnuðu plastlausa verslun. Nú eru tvö ár síðan Vistvera opnaði í Grímsbæ og hafa umhverfisþenkjandi neytendur tekið versluninni fagnandi.
Kristín Inga Arnardóttir er ein þriggja eigenda og segir hún að í upphafi hafi þær einblínt á plastlausar lausnir en fljótlega farið út í að bjóða upp á ýmiss konar áfyllingarvörur, á borð við hreinlætis- og snyrtivörur. „Fólk getur komið með hvers kyns ílát og fyllt á alls konar sápur og hreinsiefni en svo erum við líka með aðrar lausnir eins og til dæmis sápuhnetur. Það eru hnetur sem vaxa á trjám og eru með sápueiginleika. Þær má nota til að þvo þvott, búa til sápustykki úr þeim og uppþvottalög,“ segir Kristín. Sjampó, hárnæring, tannkrem og spritt er á meðal þess sem selt er eftir vigt í Vistveru.
Lægra verð og minni umbúðir
Það segir sig sjálft að mikið má spara með því að takmarka umbúðir utan um ýmsar neysluvörur auk þess sem neytandi ræður nákvæmlega hve mikið hann fær af vörunni. Ætla má að verð á vörum gæti lækkað nokkuð með magninnkaupum stóru verslananna á áfyllingarvörum því ekki eru þessar flóknu og marglaga umbúðir ódýrar í framleiðslu. Víða erlendis er áfyllingarfyrirkomulagið þekkt og þykir sjálfsagt að mæta með ílát að heiman í búðina. Hér á landi er þetta nýtt en mun ef til vill þykja sjálfsagt, rétt eins og okkur þykir orðið sjálfsagt að taka fjölnota innkaupapoka með í búðina.
„Þetta er eitthvað í menningunni okkar, eitthvað sem við þurfum að venja okkur á því þetta er breyting á lífsstíl. Fólk má alveg taka sér betri tíma í að versla. Það er svo mikill hraði í samfélaginu og fólk fer í búðina og grípur hlutina á hlaupum. Það er betra að róa sig aðeins niður og hugsa um umhverfið í leiðinni,“ segir Kristín um viðhorf Íslendinga sem hún telur geta breyst hratt í rétta átt.
Neytendur leggja línurnar
Vistvera hefur sérstöðu á markaðnum hvað áfyllingar og umbúðaleysið snertir en Kristín segist viss um að fleiri búðir bjóði viðskiptavinum upp á þessa möguleika á næstunni. En af hverju ætli stórmarkaðir hér á landi bjóði ekki upp á áfyllingarvörur af einhverju tagi? „Það er neytandinn sem kýs og eftir því sem hann sækir meira í svona vörur þá fara kannski fleiri verslanir að bjóða upp á þennan möguleika. Rétt eins og að margar vörur sem við vorum með í upphafi og fengust ekki neins staðar eru nú farnar að sjást í stærri verslunum,“ segir hún og nefnir sem dæmi bambustannbursta og hársápustykki sem fyrir tveimur árum fengust hvergi en vegna eftirspurnar neytenda eru nú til á fleiri stöðum.
Hjördís Elsa Ásgeirsdóttir, markaðsstjóri Krónunnar, staðfestir að mikil eftirspurn sé eftir áfyllingarvörum og að nú sé til skoðunar að bjóða viðskiptavinum upp á þennan kost.
„Ég vonast til að sjá stórmarkaði í framtíðinni selja ýmsar vörur, eins og hveiti og sykur sem áfyllingarvörur. Það er auðvitað mikil vinna að koma þessu af stað og þetta krefst fleira starfsfólks því það þarf að vigta og gæta vel að hreinlæti þegar um matvöru er að ræða. Kannski hindrar það stærri verslanirnar í að byrja en það má nú finna lausn á þessum atriðum,“ segir Kristín Inga.
Athugasemdir