Konur óttast bóluefnið frá AstraZenica: „Er svo hrædd við þessa blóðtappahættu“

„Ég var að fá boð í bólu­setn­ingu með AstraZenica en ég er fædd 1965. Ég þori ekki að þiggja þetta bólu­efni þar sem mér finnst það ekki öruggt,“ segir Jóhanna á Facebook.

Lífleg umræða um kosti og galla bólu­efnis frá AstraZenica hefur verið á Facebooksíðunni Góða systir í kjöl­far fétta af hugs­an­legum auka­verk­unum í formi blóð­tappa­mynd­unar við töku efn­is­ins. Ljóst er að sumar konur veigra sér við að vera bólu­setta með AstraZenica og hóf Jóhanna umræð­una með eft­ir­far­andi færslu:

„Ég hafði sam­band við heilsu­veru og heilsu­gæsl­una mína og við­brögðin hjá báðum aðilum voru þannig að mér fannst talað til mín eins og ég væri óþekkur krakki og svarið var á þá leið að þá gæti ég bara beðið þar til í júlí en þá yrði kannski boðið upp á ein­hverja opna daga,“ skrifar hún.

Hún biður þá sem eru ósam­mála að láta það vera að vera með ein­hver leið­indi þar sem þeirra skoðun breyti í sjálfu sér engu um það hvort henni finn­ist þetta bólu­efni öruggt eða ekki.

Helga Dögg segir Jóhönnu að hún þurfi að gera það sem henni þyki best.

„En berðu endi­lega saman áhætt­una af AZ við áhætt­una af COVID og veltu fyrir þér hvort sé örugg­ara og hvort þér liður betur með, að biða í óvissu eða að fá bolu­setn­ingu strax. Ég myndi sjálf þiggja AZ án þess að hugsa mig 2x um. Ég treysti sér­fræð­ing­unum til að meta áhætt­una“.

Beta hafn­aði aftur á móti bólu­efn­inu sem hún segir engan geta neytt neinn til að þiggja: „Ég tók mína ákvörðun fyrir mig og eng­ann annan. Í dag er ég fegin þar sem þetta bólu­efni var ekki fyrir minn ald­urs­hóp. Láttu eng­ann segja þér fyrir eða hafa áhrif á þína skoðun.“

Björg er á báðum áttum: „Væri alveg til í að ljúka þessu bara af en svo er ég svo hrædd við þessa blóð­tappa­hættu.“

Hildur segir best að beita skyn­sem­inni og þurfi hver að taka ákvörðun fyrir sig.

„Ef þú ferð ekki þá ferð þú að sjálf­sögðu sjálf­krafa aft­ast í röð­ina. Mjög skilj­an­legt að hver og einn geti ekki valið sér bólu­efni þegar það á eftir að bólu­setja svona marga.“

Í net­spjalli við þjón­ustu­mið­stöð Covid-19 feng­ust þau svör að ekki væri unnt að fara fram á ákveðna teg­und bólu­efnis en hún væri gefin upp þegar hver og einn væri kall­aður inn.

Í til­kynn­ingu sem birt var á vef Heilsu­gæsl­unnar í gær segir að þeir sem hafi fengið fyrr skammt af AstraZeneca í febr­úar hafi fengið boð um að koma í bólu­setn­ing á morgun, fimmtu­dag, til að fá seinni skammtin. Ekki sé mögu­leiki að sleppa konum fæddum 1967 eða síðar.

Enn­fremur segir: „Þessar konur geta valið hvort þær fá AstraZeneca fimmtu­dag­inn 6. maí eða Pfizer þriðju­dag­inn 11. maí.
Þær þurfa ekki að láta vita hvort þær velja, heldur mæta á réttum degi miðað við hvort bólu­efnið þær velja. Þær munu fá nýtt boð”.