Samkvæmt áreiðanlegum heimildum hafa Örn Pálsson, þekktur sem framkvæmdarstjóri Landssambands smábátaútgerða og vinir hans fengið óáreyttir að vera með bjórsmökkun í Grafarvogslaug kl. 07:30 á föstudagsmorgna. ÍTR fór í málið.
Nú hafa bjórmorgnarnir verið stoppaði í lauginni. Í samtali við Mannlíf sagði Ómar Einarsson, sviðsstjóri Íþrótta og tómstundasviðs Reykjavíkurborgar, að búið sé að taka fyrir þetta og málinu lokið af þeirra hálfu. „Nei það var engum sagt upp og á málinu var tekið í Grafarvogslaug. Enginn starfsmaður Grafarvogslaugar bar ábyrgð á þessu, á málinu var tekið í Grafarvogslaug og er málinu lokið af okkar hálfu.“
Samkvæmt heimildum Mannlífs vissu að minnsta kosti tveir starfsmenn Grafarvogslaugar, af bjórsmökkuninni. Sagði annar þeirra að Örn og vinir hans myndu aldrei fyrirgefa honum ef hann segði frá þessu.
Þegar Mannlíf hafði samband við Örn Pálsson og spurði hann út í málið, vildi hann ekkert tjá sig og hló við í símann. „Ég kommenta ekkert á svona maður, hvað heldurðu að maður kommenti á svona?“
Samkvæmt handbók Umhverfisstofnunar um sund og baðstaði sem út kom árið 2020, er einstaklingum undir áhrifum áfengis eða annarra vímuefna er óheimill aðgangur að sund- og baðstöðum.
Athugasemdir