Sævar segir Strætó okra á öryrkjum: „Maður getur ekki annað en hlegið að þessu“

Öryrkjar borga tæp­lega 67 pró­sentum meira fyrir bæði kort og staka ferð hjá Strætó eftir að þeir verða 67 ára gamlir.

Þar sem skrán­ing öryrkja hjá Trygg­inga­stofnun rík­is­ins breyt­ist yfir í eldri borg­ara þegar þeir verða 67 ára, þýðir það sömu­leiðis að þau kjör og afslættir sem þeir aðilar nutu áður í sam­fé­lag­inu breyt­ast sam­hliða.

Dæmi um þetta er gjald­skrá Strætó.

Öryrkjar fær­ast þannig yfir í gjald­skrá aldr­aðra hjá Strætó, um leið og þeir verða 67 ára.

Stakt far­gjald er 245 krónur fyrir aldr­aða, á meðan það er 147 krónur fyrir öryrkja.

Mán­að­ar­kort fyrir aldr­aða er á 4.000 krónur en öryrkjar borga 2.400 krónur.

Aldraðir borga 40.000 krónur fyrir árskort en öryrkjar 24.000 krónur.

Sævar nokkur vekur máls á þessu í Facebook-hópnum „Vertu á verði – eft­ir­lit með verð­lagi“.

„Öryrkjar sem voru 66 ára í gær en 67 ára í dag þurfa að borga far­gjald aldr­aðra í dag sem er 70% [rétt pró­senta er 67, innsk. blm.] hækkun. Sami öryrk­inn samt sem áður.

Sama var fyrir síð­ustu ára­mót hjá rík­is­stjórn­inni. Öryrkjar fengu 50 þús kr ein­greiðslu frá Trygg­inga­stofnun (sem var gott) en aldr­aðir fengu 0. Semsagt öryrkjar sem voru 66 ára 29. des fengu ein­greiðslu 50 þús kr en öryrki sem varð 67 ára 30. des fékk enga ein­greiðslu því þá var hann orð­inn eldri borg­ari. Samt sem áður sami öryrki.

Maður getur ekki annað en hlegið að þessu. Ríkið lítur þannig á að þegar öryrki verður 67 ára að þá verður hann ekki lengur öryrki heldur eldri borg­ari og bara í fullu fjöri og getur vænt­an­lega hoppað úr til dæmis hjóla­stól og hlaupið 100 metrana á 10 sek­úndum og svo fram­vegis. Til ham­ingju með það öryrkjar,“ segir Sævar.

Guð­mundur Heiðar Helgason, upp­lýs­inga­full­trúi Strætó, segir að þar sem skrán­ing fólks breyt­ist sjálf­krafa hjá Trygg­inga­stofnun við 67 ára aldur, eigi fólk ekki lengur rétt á kjörum öryrkja hjá Strætó eftir 67 ára afmælið. Þetta er vegna þess að eins og með margar aðrar stofn­anir, þurfa öryrkjar að fara í gegnum skrán­ingu sína hjá Trygg­inga­stofnun til að kaupa kort hjá Strætó á afslætti.

„Við skulum taka þetta til frek­ari skoð­unar hjá Strætó,“ bætti Guð­mundur við í sam­tali við blaða­mann.