Sólveig Anna Jónsdóttir, sem nú gerir tilraun til hallarbyltingar í annað sinn í Eflingu með framboði til formanns, sagði í dag að félög innan Alþýðusambandsins hyggist blanda sér í komandi formannskosningar Eflingar. Telur hún að markmiðið sé að koma í veg fyrir að B-listi hennar beri sigur úr býtum í kosningunum. Drífa Snædal, formaður ASÍ neitar að tjá sig um orð hennar.
Í dag skrifaði Sólveig Anna Facebook færslu þar sem hún meðal annars sagði að stemmningin innan ASÍ sé afbrigðileg. „Sem dæmi um þá afbrigðilegu stemmningu sem ríkir innan vébanda „hreyfingarinnar“ vil ég nefna þá staðreynd að fjöldi starfsfólks ASÍ sýndi starfsmanni Eflingar, sem hafði hótað að koma heim til mín og gera mér illt, mikla hluttekningu hér á Facebook, þegar að honum hafði verið sagt upp störfum hjá Eflingu.“
Sagðist Sólveig Anna hafa þær heimildir að funda eigi innan raða aðildarfélaga ASÍ á morgun og sé tilgangurinn að klekkja á henni og hennar framboði.
„Mér hefur borist til eyrna að á morgun eigi að halda sérstakan fund starfsfólks þeirra félaga sem eiga aðild að ASÍ. Og að tilgangur fundarins sé að samþykkja og senda frá sér ályktun til stuðnings starfsfólki skrifstofu Eflingar, og gegn mér og framboði Baráttulistans til stjórnar félagsins. Ég hef heyrt að starfsfólk Eflingar sé mjög áfram um að slík ályktun verði skrifuð og send til fjölmiðla á morgun. Hinn daginn hefst svo kosninginn til formanns og stjórnar félagsins.“
Drífa Snædal, formaður ASÍ vildi ekki tjá sig um orð Sólveigar Önnu þegar Mannlíf hringdi í hana í kvöld og vildi ekki kannast við fundinn. „Ég get sagt það að ég er ekki að skipuleggja neinn fund.“
Athugasemdir