Óður smáhundur ógnaði Garðbæingum – Grímuklæddir gaskútaþjófar hurfu sporlaust

Lög­reglan á höf­uð­borg­ar­svæð­inu hafði um nóg að snú­ast frá því síð­degis í gær og til fimm í morgun.  Alls gistu nú sjö manns fanga­geymslur eftir nótt­ina.

Þegar lög­reglan hugð­ist stöðva bif­reið sem ók Vest­ur­lands­veg og athuga með ástand og rétt­indi öku­manns­ins, hlýddi hann ekki er lög­reglan gaf honum merki um að stöðva bif­reið­ina. Gaf öku­maður í og hófst þá eft­ir­för lög­regl­unnar. Þrír aðilar voru í bílnum en öku­mað­ur­inn ók meðal ann­ars á móti umferð á Vest­ur­lands­vegi í elt­inga­leiknum. Gerðu þrí­menn­ing­arnir svo til­raun til að hlaupa undan lög­regl­unni en voru stuttu síðar hand­teknir, allir sem einn. Voru þeir allir kærðir fyrir að brjóta vopna­lög og gista nú í fanga­geymslu lög­reglu í þágu rann­sóknar máls­ins.

Grímuklæddir stálu gaskútum á rafskútum

Til­kynn­ing barst lög­reglu um fjóra aðila á raf­skútum sem voru að stela gaskútum í hverfi 108 í Reykja­vík. Allir voru þeir grímu­klæddir en þrátt fyrir mikla leit lög­reglu, fund­ust þeir ekki.

Þá var til­kynnt um þjófnað úr verslun í miðbæ Reykja­víkur og er lög­reglan að rann­saka málið. Aukreitis barst lög­reglu til­kynn­ing um með­vit­un­ar­lausan mann í mið­bænum en kom svo í ljós að hann var sótölv­aður.

Einnig var sam­band haft við lög­reglu vegna manns sem lá öskr­andi á jörð­inni í mið­bænum. Reyndist hann ökla­brot­inn en hann var mold­ölv­aður. Maðurinn var fluttur á slysa­deild til aðhlynn­ingar.

Óður smá­hundur réð­ist að fólki og öðrum dýrum í Garðabæ en er lög­regl­una bar að garði var eig­and­inn mættur. Áverkar voru minni­háttar.

Ældi í leigubíl og neitaði að borga

Lögreglu var til­kynnt um að öku­maður hefði keyrt á vegrið á Hafn­ar­fjarð­ar­vegi og haldið svo áfram akstri. Lagði öku­mað­ur­inn svo bif­reið sinni og gerði heið­ar­lega til­raun til þess að flýja. Lög­reglan náði honum þó og kom þá í ljós að mað­ur­inn var drukk­inn. Var hann vistaður í fanga­geymslu í þágu rann­sóknar máls­ins.

Þá fékk leigu­bíl­stjóri til sín fremur óþægi­legan mann í bif­reið sína en sá ældi upp í leigu­bif­reið­inni og neit­aði svo að borga fyrir farið. Greiddi mað­ur­inn skuld sína og fór heim til sín, eftir að lög­reglan mætti á vett­vang.

Meig á gólf skemmtistaðar

Aðili var til vand­ræða á skemmti­stað í Hafn­ar­firði. Hafði hann gert sér lítið fyrir og kastað af sér þvagi inni á staðnum og sparkað í bif­reið sem hafði verið lagt fyrir utan stað­inn.

Einnig fékk lög­reglan til­kynn­ingu vegna lík­ams­árásar á skemmti­stað í Hafn­ar­firði.

Aukreitis var til­kynnt um kóf­fullan mann sem lá á jörð­inni í miðbæ Kópavogs. Var honum ekið heim til sín.

Þá var til­kynnt um rok­fulla konu sem haldið var að dyra­vörðum í hverfi 203 í Kópavogi. Var hún hand­tekin fyrir lík­ams­árás og vistuð í fanga­geymslu lög­reglu í þágu rann­sóknar máls­ins.