Eitt og annað gekk á á höfuðborgarsvæðinu í morgun. Vopnað rán, innbrot og eldur í vinnuvél við Úlfarsfell.
Snemma í morgunsárið barst tilkynning til lögreglu um vopnað rán í Reykjavík, þar sem tveir aðilar heimtuðu fíkniefni af tveimur öðrum. Átök brutust þá út á milli þeirra sem enduðu á því að annar þeirra sem átti að ræna, hlaut stungusár á handlegg. Voru árásaraðilarnir handteknir og vistaðir í fangageymslu vegna málsins en hinn slasaði var fluttur með sjúkrabíl á bráðamóttökuna.
Við Úlfarsfell kviknaði í vinnuvél og náði eldurinn að breiðast út í að minnsta kosti eina bifreið. Að sögn lögreglunnar leit þetta ekki vel út í fyrstu, þar sem mikill eldur logaði auk sprenginga sem urðu, en slökkviliðið náði þó fljótlega að slökkva eldinn. Unnið er að rannsókn á eldsupptökum.
Þá var tilkynnt um yfirstandandi innbrot í Vesturbæ Reykjavíkur skömmu fyrir hádegi. Var um að ræða tvo aðila í annarlegu ástandi og dró annar þeirra upp hníf er að þeim var komið. Náðu húsráðendur að yfirbuga manninn áður en lögreglan mætti á vettvang. Voru báðar boðflennurnar handteknar og gista nú fangageymslu og verða yfirheyrðir þegar þeir verða skýrsluhæfir.
Athugasemdir