Gríðarmiklar skemmdir urður á slökkvistöðinni á Hrauni, við álverslóðina á Reyðarfirði í óverðrinu í gær. Hurðir og og veggplötur hreinlega sprungu af húsinu og ljóst að tjónið er umtalsmikið. Hefur vaktþjónustu verið komið í skjól hjá björgunarsveitinni á Reyðarfirði.
„Það sprungu inn hurðir á norðurgafli hússins, þeirri hlið sem vissi upp í vindinn. Síðan fór hluti af veggnum hinu megin,“ sagði Sigurjón Valmundsson, slökkvistjóri í Fjarðabyggð í samtali við Austurfrétt.
Segir hann að sem betur fer hafi enginn verið í bílasalnum er hurðirnar fóru af. Fuku sex þeirra alveg af og sú sjöunda skemmdist. Það slökkviliðs- og sjúkraflutningafólk sem var á vakt í húsinu kom sér í skjól í mesta hamaganginum.
„Það var vont veður og síðan var fjandinn laus. Það var heilmikið havarí þegar þetta gerðist en fólk hélt síðan til í þeim hluta hússins sem var alveg öruggur,“ sagði Sigurjón ennfremur við Austurfrétt.
Seinni partinn í gær og í nótt var engin vakt í húsinu en henni hefur nú verið komið fyrir tímabundið í Þórðarbúð, húsi björgunarsveitarinnar Ársólar á Reyðarfirði. „Við gátum haldið okkar lágmarksviðbragði svo þetta hafði ekki áhrif á útkallsgetuna.“
Er nú lagt allt kapp á að loka slökkvistöðinni, áður en frekari viðgerðir verða metnar. Innandyra urðu einhverjar skemmdir, helst á veggjum og hurðarköntum og víðar vorur innanstokksmunir og pappír á rúi og stúi.
Þá má sjá beyglur á bifreiðum slökkviliðsins en bíllinn annast að jafnaði sjúkraflutningar í Fjarðarbyggð. Rúða brotnaði í tækjabíl og þriðja sjúkrabílnum.
Eins og sjá má á ljósmyndum slökkviliðsins má sjá að ekki var um neina golu að ræða í gær.
Athugasemdir