Brynjar Níelsson, aðstoðarmaður dómsmálaráðherra, fór með kvíða í brjósti á árshátíð lögfræðinga og lögmanna, Lagadaginn, síðstaliðið föstudagskvöld. Vandræði hans hófust fyrir alvöru þegar leið á kvöldið og kom að þeirri stundu að Brynjari langaði til að dansa við eiginkonuna.
Brynjar segir skemmtilega frá kvöldinu í færslu á Facebook. Þar skellir hann skuldinni á Lækna-Tómas, eða skurðlækninn Tómas Guðbjartsson.
„Ég fór á dansiball með Soffíu í gærkvöldi í fyrsta sinn í langan tíma, sem var hluti af Lagadeginum svokallaða, þar sem allir gáfuðustu lögfræðingar landsins koma saman og gera sér glaðan dag. Þarna voru stjörnulögmaðurinn og Gucci og Armani lögmaðurinn, sem var með sólgleraugu í myrkrinu, og allt upp í virðulega dómara á öllum dómstigum. Ég ætlaði að draga dómsmálaráherra með mér sem hélt nu ekki. Hann væri nú kaffærður af lögfræðingum allan daginn í ráðuneytinu og ætlaði því ekki að eyða kvöldinu með slíku fólki.
Ég var með nokkurn kvíða fyrir dansiballinu. Ég hafði ekki farið í sparifötin í langan tíma. Einhverra hluta vegna pössuðu fötin illa og eina bindið sem ég fann var komið með myglu. En þrátt fyrir þetta mótlæti reimdi ég á mig dansskóna og ætlaði að snúa Soffíu hægri vinstri á dansgólfinu og taka alla gömlu stælana. En þegar tilkom var þrekleysið algjört og ég rétt hafði af einn vangadans með harmkvælum. Ég skrifa þetta á Lækna- Tómas sem skar úr mér hluta af lunganu í lok síðasta árs.“
Athugasemdir