Mennirnir tveir sem eru í haldi lögreglu grunaðir um að hafa ætlað að fremja hryðjuverk á Íslandi heita Ísidór Nathansson 24 ára og Sindri Snær Birgisson 25 ára. Samstöðin birtir myndinni sem sjá má hér fyrir ofan en Ísidór er til vinstri og Sindri til hægri. Samstöðin fer í þaula yfir hvaða fótspor þeir skildu eftir sig á internetinu. Af því sem þar kemur fram verður vart horft fram hjá því að að Ísidór, í það minnsta, var eldheitur Sjálfstæðismaður.
Ísidór fylgdist á Twitter með hinum ýmsu hægrimönnum svo sem Jordan B. Peterson og Paul Joseph Watson. Athygli vekur að eina íslenska pólitíkin sem hann fylgdist með voru Ungir sjálfstæðismenn, Bjarni Benediktsson, Brynjar Níelsson, Sigríður Andersen og Erna Ýr Öldudóttir.
Samstöðin segir enn fremur: „Ísidór opnaði twitter-aðgang í apríl á þessu ári, sjá hér, þar sem hann fylgist með fjölmörgum síðum um þrívíddarprentanir vopna, sem flestar eru með áróður gegn takmörkun á byssueign og andúð gegn vinstrimönnum. Ein er með slagorðið: curb stomp your local commie, en curb stomp er það kallað þegar fórnarlambið er látið leggjast á magann og opinn munnur þess settur yfir gangstéttarbrún og síðan trampað af krafti á hnakkann. Þau sem sáu American History X muna eftir slíkri árás.“
Samstöðin er umræðu- og fréttavettvangur á vegum Sósíalistaflokksins en líkt og hefur komið fram þá dreymdu þeim Ísidór og Sindra Snæ að myrða Gunnar Smára Egilsson, formann framkvæmdastjórnar Sósíalistaflokksins, og Sólveigu Önnu Jónsdóttur, formann Eflingar.
Athugasemdir