Í góðum málum – Jón Bjarki Magnússon
Jón Bjarki Magnússon gerði frábæra heimildarmynd, þar sem hann var í raun líkt og fluga á vegg á heimili ömmu sinnar og afa, á síðasta hluta æviskeiðs þeirra; útkoman varð heimildarmyndin Hálfur álfur, þar sem segja má að dramatík hversdagsleikans hjá hverfandi kynslóð komi berlega í ljós:
„Í stuttu máli fór ég í meistaranám í sjónrænni mannfræði í Berlín og þegar ég fór að hugsa um lokaverkefni þá kallaði þetta mikið á mig, að fylgja þeim gömlu eftir,“ sagði Jón Bjarki á sínum tíma um heimildarmyndina.
Kóvid setti mörg strik í reikninginn hjá Jóni Bjarka og frumsýningu myndarinnar var frestað aftur og aftur. En Jón Bjarki gafst aldrei upp og hélt ótrauður áfram með seiglu og dugnaði í bland við mikla hæfileika og kom myndinni á legg.
Frábær mynd.
Nú er svo komið að heimildarmynd Jóns Bjarka, hálfur álfur, hefur verið tekin til sýninga á Netflix, sem er ekki lítill árangur.
Eftir erfiða fæðingu getur nú Jón Bjarki notið uppskerunnar af öllu erfiðinu og ástæða til að hrósa honum fyrir að gefast aldrei upp.
Í slæmum málum – Katrín Jakobsdóttir forsætisráðherra
Hryllilegar aðfarir íslenskra stjórnvalda gegn flóttafólki í neyð hafa vakið athygli langt út fyrir landsteinana. Leitað er að fólki út um allan bæ og það hirt upp og borið inn í lögreglubíla og síðan er fólkinu hent upp í vél sem fer með það á götuna til Grikklands.
Hvort þú sért fatlaður eða veikur á einhvern hátt skiptir engu máli – burt frá Íslandi skulið þið fara og það strax.
Það vita allir að Sjálfstæðisflokkurinn með Bjarna Benediktsson og Jón Gunnarsson í broddi fylkingar stendur fyrir þessum hreinsunum, en þeir myrkra-kumpánar Bjarni og Jón eru ekki einir sem bera ábyrgð – alls ekki.
Fólkið í VG og Framsóknarflokknum er líka ábyrgt fyrir þessari hreinræktuðu illsku, því þótt þú kjósir að forðast sviðsljósið og segja lítið þá ertu samsekur ef þú samþykkir með þögn þinni og aðgerðarleysi.
Katrín Jakobsdóttir er forsætisráðherra og ber því mesta ábyrgð í þessu viðbjóðslega máli; hún hefur kosið að sitja áfram í kolsvörtum skugga Bjarna, sem ásamt skósveini sínum, Jóni Gunnarssyni, vilja gera Ísland hreint af stórhættulegu og fötluðu fólki – þeir vilja Ísland fyrir Íslendinga, og eru stoltir af gjörðum sínum eins og skýrt kom fram á landsfundi Sjálfstæðisflokkisns nýverið; þar var klappað fyrir þjóðernishyggju og útlendingaandúð; þar var klappað fyrir ofbeldi gegn fötluðu og fátæku fólki sem getur ekki varið sig; þar var klappað fyrir hatri og hinni íslensku Kristalsnótt.
Ef Katrín er ánægð með aðgerðirnar mun stjórnin halda, ef hún er manneskja til að standa í lappirnar þá slítur hún þessu stjórnarsamstarfi; hver sem niðurstaðan verður hjá henni er það alveg klárt mál að Katrín Jakobsdóttir er ábyrg fyrir gjörðum Bjarna og Jóns. Hún er verkstjórinn.
Telst Katrín því í slæmum málum.
Athugasemdir