Hátt í 150 manns hefur lýst yfir áhuga á að bjarga búfénaðinum á Nýja Bæ í Borgarnesi.
Slæm meðferð á dýrunum hefur verið mikið til umfjöllunar að undanförnu en Matvælastofnun hefur setið undir gegndarlausri gagnrýni þeirra sem reynt hafa að vekja athygli á málinu. Á dögunum mætti Mast á svæðið og felldi eitt folaldið og flutti 12 hross til slátrunar. Eigendur dýranna og ábyrgðaraðilar þau Kristinn Reynisson og unnusta hans Jenný Ósk Vignisdóttir og móðir hennar Þórunn Björg Bjarnadóttir.
Nú er búið að stofna viðburð á Facebook sem ber heitið Björgum dýrunum í Bæjarsveit. Tuttugu hafa samþykkt að mæta og bjarta dýrunum en um 140 hafa lýst yfir áhuga á því. Texti viðburðarins er eftirfarandi:
„Tilgangur með þessum viðburði er að koma búfénaði á Nýja Bæ til hjálpar. Ástand dýranna fer versnandi með hverjum degi sem líður en um langt skeið hafa þau hvorki haft aðgang að fóðri né vatni. Enginn sinnir þörfum dýranna, hvorki eigendur né yfirvöld. Því er brýnt að dýravinir taki nú höndum saman til að koma í veg fyrir frekari þjáningu og vosbúð dýranna. Öll aðstoð frá bændum í nágrenninu er vel þegin. Búið er að útvega fóður en vantar sjálfboðaliða til að aðstoða okkur við að flytja það á staðinn. Hvetjum alla dýravini til að leggja þessu brýna málefni lið.“
Ekki náðist í eigendur dýranna við gerð fréttarinnar.
Athugasemdir