Ertu með lélegt úthald og glímir jafnvel við depurð? Langar þig til að passa aftur í gömlu fötin þín? Leiðist þér í líkamsræktarstöðvum? Þá getur lausnin verið hér að neðan.
Margir hafa komist að raun um að gönguferðir um fjöll og flatlendi á Íslandi eru einhver besta heilsurækt sem kostur er á. Ferðafélag Íslands heldur úti fjölmörgum gönguhópum af ýmusm áreynslustigum sem allir hafa það að markmiði að efla fólk líkamlega og andlega og auka þannig lífsgæði þess.
Fyrsta skrefið er gönguhópur sem starfað hefur í átta ár. Hátt í þúsund manns hafa tekið þátt í námskeiðum hópsins frá upphafi og fjölmargir fundið gleðina í því að ganga á fjöll og finna fegurðina í hreyfingunni og fræðslunni sem fylgir göngunum.
Lagt er upp með það í göngunum að fræða fólk og skemmta í leiðinni. Fastur liður er æfingakerfið Haukurinn og söngæfing.
Fyrsta skrefið hefur göngu sína í janúar og lýkur verkefninu í maí þegar Reiðmenn vindanna koma fram á Úlfarsfelli. Alls er boðið upp á hátt í 30 göngur um helgar og á fimmtudögum þegar gengið er á Úlfarsfell. Lagt er upp með að ganga á hraða sem hentar öllum í hópnum og byggja smám saman upp þol.
Næsta ganga er á Sýlingafell en síðan taka ævintýrin við, eitt af öðru inn í vorið. Flest fjöllin eru léttgengin. Að vori verður síðan haldið á Sólheimajökul og fjöll í grennd við Vík í Mýrdal. Í desember verða svo allir sem endast út verkefnið komnir í það form sem stefnt er að. Umsjónarmenn Næsta skrefsins eru Reynir Traustason og Guðrún Gunnsteinsdóttir.
Skráning er í fullum gangi á vef Ferðafélags Íslands. Aðeins rúmlega 30 manns fá inngöngu.
Athugasemdir