Í Litháen hófst í vikunni þjálfun úkraínskra hermanna á sviði sprengjuleitar og sprengjueyðingar en um er að ræða samstarfsverkefni Norðurlandanna og Litháen. Íslenskir sprengjusérfræðingar eru meðal þeirra sem taka þátt í þjálfuninni.
Fram kemur í frétt á vef stjórnarráðsins að markmið verkefnisins sé að gera hjálpa úkraínska hernum að finna og eyða ósprungnum sprengju í Úkraínu í kjölfar innrásar Rússlands. Talið er að ósprungnar sprengjur af ýmsum tegundum sé að finna á allt að fimmtungi landssvæðis Úkraínu. Er þjálfunin liður í því að styrkja varanrsveitir Úkraínu og um leið draga úr hættu á að íbúar landsins skaðist.
„Eftir að hafa séð með eigin augum eyðilegginguna og hörmungarnar sem sprengjuárásir Rússa hafa valdið almenningi í Úkraínu er ég stolt að því að við getum lagt okkar af mörkum á sviði sem Ísland hefur sérþekkingu á í samstarfi við okkar nánustu samstarfsríki,“ segir Þórdís Kolbrún Gylfadóttir utanríkisráðherra en hún kynnti verkefnatillögu um þetta málefni á ráðstefnu um stuðning við öryggi og varnir Úkraínu í Kaupmannahöfn í fyrrasumar.
Utanríkisráðuneytið hefur annast undirbúning og framkvæmd verkefnisins í samstarfi við sérfræðinga séraðgerðasviðs Landhelgisgæslunnar en þeir hafa að undanförnum árum sinnt verkefnum á vegum Atlantshafsbandalagsins á sviði þjálfunar sprengjusérfræðinga, meðal annars í Jórdaníu og Írak.
Stefnt er að því að ljúka að minnsta kosti fjórum kennslulotum á þessu ári en hver lota stendur yfir í fimm vikur.
Athugasemdir