„Ég fæddist í fight or flight,‟ segir Soffía Hrönn Halldórudóttir, 38 ára móðir, sem er nýjasti viðmælandi hlaðvarpsins Sterk saman. DV fjallaði um lífsreynslu Soffíu í gær en á heimilinu var mikið ofbeldi. Soffía ólst upp í Breiðholt og segir hún frá því hvernig ofbeldið hafi byrjað þegar hún var aðeins tveggja ára gömul. „Pabbi byrjaði að „grooma‟ mig þegar ég var tveggja ára en þá kom mamma of snemma heim úr vinnunni og hann sat með mig í fanginu á klósettinu og var að runka sér‟, segir hún en þegar móðir hennar var ólétt af henni hafi vistmaður á Kleppi sparkað fast í kviðinn á henni. Soffía fann aldrei til öryggis í æsku en hún ákvað um leið og hún hafði vit til að verja systur sína.
„Hún var það fallegasta í heimi. Ef hún hellti niður og hann sá það ekki þá sagðist ég hafa gert það og tók þá á mig höggin.‟ Soffía var ung þegar faðir hennar misnotaði hana kynferðislega. „Ég spurði alltaf gesti hvort ég mætti koma með þeim heim og meinti það og ég óskaði þess svo heitt að hann myndi deyja.‟ Þá segir hún föður sinn hafa verið nálægt því að bana móður hennar í nokkur skipti.
Einn daginn fór faðir hennar út að skemmta sér. Móðir Soffíu kallaði þá á hana og systur hennar og bað þær um að setja dótið sitt í svartan poka. Þær fóru af heimilinu og í Kvennaathvarfið en segir Soffía að þetta sé enn þann dag í dag hennar uppáhalds dagur. ,,Við fórum í leigubíl og það var tekið á móti okkur. Í fyrsta skipti sá ég aðra krakka sem voru í sömu eða svipaðri stöðu og ég, allir svolítið tættir og þarna lofaði mamma okkur að við þyrftum aldrei að búa aftur með pabba okkar.‟
Soffía gat ekki unnið úr sínum áföllum og hóf hún neyslu fíkniefna á unglingsárunum. Þegar hún varð átján ára gömul varð hún edrú og hefur verið það síðustu tuttugu ár. Í hlaðvarpinu segir hún frá reynslu sinni og hefur hún unnið úr áföllunum með miklum dugnaði. Viðtalið við Soffíu Hrönn má hlusta á í heild sinni í hlaðvarpinu Sterk saman.
Athugasemdir