Kindur ganga enn úti í Þverárhlíð í Borgarbyggð, þrátt fyrir vetrarhörkur.
Steinunn Árnadóttir, hestakona, organisti og baráttukona bendir enn og aftur á slæma meðferð á kindum á bænum Höfða í Borgarfirði. Undanfarið ár hefur Steinunn verið afar dugleg við að benda á slæman aðbúnað fjárins á Höfða, sem virðist lítið hafa skánað miðað við nýjustu færslu Steinunnar.
Í færslunni birti hún ljósmyndir af kindum frá Höfða, vaða snjóinn í vetrarfrostinu. Kallar Steinunn kindurnar „útigangsfé“.
„Útigangsfé í Þverárhlíð: sjá meðfylgjandi myndir.
Á sama tíma og bændur eru að hrósa happi að hafa fundið eða heimt kindur til að koma þeim í skjól eru vesalingar úr Hryllingssögu minni á vergangi. Þetta kallast útigangsfé og í flestöllum sveitarfélögum er verið að bjarga slíkum kindum. En Borgarbyggð hefur sérstakt umburðarlyndi með þessum bændum. Þetta hefur alltaf verið svona og mesta vesen að aðhafast eitthvað í því.“
Þannig byrjar færslan en hún segist næst hafa hitt fjárbónda á leið sinni sem sagði henni að kindurnar „væru alls staðar annars staðar betur komnar en heima hjá sér.“
„Ég hitti fjárbónda á leið minni. Hann sagði að þessar kindur væru alls staðar annars staðar betur komnar en heima hjá sér! Það segir eitthvað um ástandið á þessum „búskap“ sem NB þiggur umtalsverðar upphæðir frá ríkinu/okkur í beingreiðslur, gæðastýringu og það sem best er „beingreiðslur í ull“!
Er það á þennan hátt sem við viljum sjá sauðfjárrækt á landinu?
Tekið saman: Þessar kindur eru á vergangi. Enginn bjargar þeim og ef þeim er bjargað þá er það verra fyrir þær að fara til síns heima.“
Athugasemdir