Dorrit í nágrannaerjum við vogunarsjóðsmógúl: „Komið í hendurnar á lögfræðiteymi mínu“

Enn og aftur lekur vatn inn í íbúð Dorritar Mouassaieff í London en vand­ræðin byrj­uðu árið 2019.

Dorrit Moussaieff, fyrr­ver­andi for­seta­frú og eig­in­kona Ólafs Ragnars Gríms­sonar, virð­ist ansi óheppin með nágranna en enn og aftur hefur nú orðið mik­ill leki inn í íbúð Dorritar í London en vatnið kemur úr íbúð fyrir ofan hana. Sú íbúð er í eigu Greg Coffey, vog­un­ar­sjóðs­brask­ara frá Ástralíu en árið 2019 varð hún fyrir miklum skemmdum af völdum leka sem lak úr íbúð sem er eða var í eigu Loro Piano fjöl­skyld­unnar sem rekur heims­frægt ítalskt fata­hönn­un­ar­fyr­ir­tæki. Trygg­ing­ar­fé­lag hennar neit­aði síðar að tryggja hana fyrir vatns­skemmdum vegna of tíðra vatnsleka.

Í nýlegri Instagram-færslu birtir Dorrit mynd­band sem sýnir gríð­ar­legan leka í íbúð hennar og er greini­lega ósátt enda segir hún hvorki Greg Coffey né eig­in­konu hans hafa beðist afsök­unar á lek­anum.

„Flóð frá eign Greg Coffey sem er fyrir ofan mig. Margir mán­uðir liðnir en hvorki hann né kona hans hafa svo mikið sem beðist afsök­unar.“ Dorrit heldur áfram: „Trygg­inga­fé­lag þeirra segir að „þau hafi ekki sýnt af sér van­rækslu“ og því sé engin þörf á að bæta mér upp þann gríð­ar­lega skaða sem ég hef orðið fyrir sem ekki aðeins varð á íbúð minni, heldur einnig á inn­búi mínu og eigum. Nú er öll bygg­ingin án vatns­trygg­ingar en það er vegna leka frá Loro Piano fjöl­skyld­unni.“

Segir hún enn­fremur í færsl­unni að pípu­lagn­inga­meist­ari á vegum Coffey hafi gefið mis­mun­andi ástæður fyrir lek­anum. „Þegar þetta mynd­band er tekið segir pípar­inn að ástæðan sé ísvélin, þar á undan var það annað hvort upp­þvotta­vélin eða þvotta­vélin og þar á undan var það sturtan.“

Dorrit segir að máið sé nú úr hennar höndum. „Nú er málið úr mínum höndum og komið í hend­urnar á lög­fræði­teymi mínu. Og mér sýn­ist sem fjöl­miðlar séu komnir með þetta líka á borð til sín. Lög­fræð­ingur Greg Coffey segir að hún geti ekki sam­þykkt myndefnið frá mér vegna örygg­is­á­stæðna, þannig að ég hef, treg­lega, neyðst til að birta þetta henni til hægð­ar­auka, Zoe ég vona að þetta muni hjálpa þér.“

Einn af fylgj­endum Dorritar skrifar athuga­sem við færsl­una og segir: „Guð minn góður. Þvílík martröð og því­líkir yfir­læt­is­legir nágrannar!“ Þessu svarar Dorrit: „Ég er með önnur orð yfir þau en mun leyfa öðru fólki að nota þau.“