Sjálfstæðisflokkurinn fundar vegna mögulegs framboðs Katrínar: „Meiri lík­ur en minni“

Þing­flokkur Sjálf­stæð­is­flokks­ins hefur verið boð­aður til fundar á morgun, vegna mögu­legs for­seta­fram­boðs Katrínar Jak­obs­dóttur for­sæt­is­ráð­herra. Hildur Sverr­is­dóttir þing­flokss­for­maður flokks­ins er sú sem ákvað fund­ar­boðið.

Í sam­tali við mbl.is stað­festir Hildur að hún hafi boðað til fund­ar­ins.

„Já ég get stað­fest að við mun­um halda þing­flokks­fund á morg­un. Þrátt fyr­ir að Alþingi sé ekki að störf­um finnst mér rétt að boða til þing­flokks­fund­ar vegna þess­ar­ar stöðu. Þó að ekk­ert liggi fyr­ir enn sem komið er finnst mér eðli­legt að við ræðum sam­an okk­ar í milli hvað mögu­legt fram­boð for­sæt­is­ráð­herra gæti haft í för með sér,“ seg­ir Hild­ur í sam­tali við mbl.is.

Aðspurð um það hvaða áhrif fram­boð Katrínar hefði á rík­is­stjórn­ar­sam­starfið svar­aði Hildur:

„Það gef­ur auga leið að það mun hafa ein­hver áhrif á þetta sam­starf. Staðan er sú að þetta ligg­ur ekki fyr­ir.“

Telur Hildur að meiri líkur en minni séu á að Katrín bjóði sig fram til emb­ættis for­seta Íslands.

„Miðað við þann tíma sem hef­ur liðið þá myndi ég per­sónu­lega halda að það væru meiri lík­ur en minni. En ég hef ekk­ert meiri fyr­ir mér í því held­ur en hver ann­ar sem er að fylgj­ast með þess­ari at­b­urðarás að svo komnu máli,“ seg­ir Hild­ur.

Samkvæmt heim­ildum mbl.is ræddi Þórdís Kolbrún Reyk­fjörð Gylfa­dóttir, vara­for­maður Sjálf­stæð­is­flokks­ins og fjár­mála­ráð­herra, við þing­menn flokks­ins um hvað væri best að gera ef svo færi að Katrín færi í fram­boð og hvaða áhrif það hefði á rík­is­stjórn­ar­sam­starfið. Ýmsir kostir ku hafa verið ræddir í þeim sam­tölum.

Sagt var frá því í fréttum í gær að lénið katrinjak­obs.is hafi verið stofnað á þriðju­dag­inn í síðstu viku. Rétt­haf­inn af lén­inu er sá sami og var rétt­hafi af lén­inu katrinjak­obs­dottir.is sem stofnað var árið 2006 en lík­legt verður að telj­ast að Katrín sé sá rétt­hafi enda hefur það lén verið notað af henni sjálfri í gegnum árin.