Í gær greindu fjölmiðlar frá því að skólastjóri Dalskóla hefði sent forráðamönnum nemenda bréf til þess að vara þá við því að dæmdur kynferðisbrotamaður hafi sótt sundlaugina á sama tíma og börn í skólanum eru í skólasund og maður hafði vingast við sum þeirra. Í bréfinu var sagt að skólinn ynni með starfsfólki laugarinnar og yfirvöldum til að reyna stoppa komu mannsins í laugina meðan skólasund stæði yfir.
DV greinir frá því að maðurinn sé Jón Sverrir Bragason en hann var dæmdur í fjögurra ára fangelsi fyrir kynferðisbrot gegn dreng með ódæmigerða einhverfu. Þá hafi hann einnig verið dæmdur fyrir flytja inn barnaníðsefni árið 2014 og fyrir það hlaut hann tveggja ára dóm. Þá talaði DV við móður pilts sem hafði vingast við Jón Sverri í sundklefa Dalslaugar.
„Sonur minn er bráðvelgefinn og það er ekki auðvelt að plata hann en hann segir að þessi maður sé bara meistari, mikill snillingur og góður vinur sinn. Þetta finnst mér mjög óhugnanlegt. Þessi maður er búinn að leggja á sig margra mánaða vinnu til að ávinna sér traust hans og drengurinn gerir sér enga grein fyrir því að neitt athugavert sé í gangi. Ég spurði hann hvort vináttan hefði verið komin á það stig að ef hann hefði boðið honum til dæmis í ís eða eitthvað svoleiðis, að þá hefði hann farið með honum. Hann sagði hiklaust já. Hann hefði ekki grunað að þetta væri annað en bara eðlilegur, gamall maður í sundi.“
Athugasemdir