Ölvuð og snarrugluð kona braut rúðu i stigagangi fjölbýlishúss og tók sér þar bólfestu. Þegar lögreglu bar að garði var hún til leiðinda og neitaði að yfirgefa staðinn. „Konan ekki í ástandi til að vera meðal almennings og hún því vistuð í klefa,“ segir í Dagbók lögreglunnar. Á sömu slóðum var brotist inn í geymslur í fjölbýli í Reykjavík. Málið í rannsókn.
Dósaþjófar voru staðnir að verki við iðju sína. Aðilarnir voru handteknir þar sem grunur var uppi um skipulagða brotastarfsemi. Dósaþjófarnir voru vistaðir í klefa í þágu rannsóknar málsins.
Tilkynnt um hnupl í stórvöruverslun. Framburður tekinn af sakborning á vettvangi.
Ökumaður, sem stöðvaður í umferðinni, reyndist vera án gildra ökuréttinda. Þá var barn bílstjórans ekki í öryggisbelti. Hinn brotlegi á yfir höfði sér sekt.
Lögregla var kölluð til vegna þriggja unglinga sem brutu rúðu á húsi í íbúðahverfi í Kópavogi. Þeir voru horfnir á braut áður en lögregla kom. Hinir brotlegu komu síðan aftur og brutu aðra rúðu og lögðu síðan á flótta út í nóttina. Skömmu síðar barst lögreglu tilkynning um að þeir væru að brjóta rúðu í strætisvagnaskýli.
Lögregla hafði uppi á drengjunum. Þá kom í ljós að þeir voru með kúbein, hamar og hníf meðferðis. Einn drengjanna réðst á lögreglumann með barefli við handtöku þremenninganna áður en hann var yfirbugaður.
Tveir drengjanna voru undir 18 ára aldri og einn þeirra undir 15 ára aldri. Sá sem réðst á lögreglumanninn reyndist vera 18 ára og var hann vistaður í klefa. Hinir tveir voru fluttir í önnur úrræði í samráði við foreldra og barnaverndarnefnd. Einn drengjanna hótaði ítrekað að drepa lögreglumennina. Drengirnir eiga yfir höfði sér fjölda kæra vegna málsins.
Í morgunsárið voru sjö manns læstir inni í fangaklefum lögreglunnar fyrir ýmsar sakir.
Athugasemdir