Innviðafélag Vestfjarða lýsir mjög miklum vonbrigðum og furðu yfir fréttum af stöðu framkvæmda á Dynjandisheiði, nú þegar aðeins sjö kílómetra vantar upp á að bundið slitlag verði yfir heiðina alla. Vegagerðin svarar því einu að fjármagn skorti og ekkert verði aðhafst í bili. Þetta kemur fram í fréttatilkynningu frá Innviðafélaginu.
„Innviðafélag Vestfjarða kallar eftir því við Innviðaráðherra sem og þingmenn kjördæmisins að þeir skýri hverju sæti þessi verkótti og framkvæmdaleysi“, segir Unnar Hermannsson, sem er stjórnarmaður í Innviðafélaginu. „Við skorum á stjórnvöld að girða sig í brók og klári að leggja bundið slitlag á Dynjandisheiði. Annað er ófært.“
Fréttatilkynninguna má lesa í heild sinni hér fyrir neðan:
Innviðafélag Vestfjarða lýsir mjög miklum vonbrigðum og furðu yfir fréttum af stöðu framkvæmda á Dynjandisheiði, nú þegar aðeins sjö kílómetra vantar upp á að bundið slitlag verði yfir heiðina alla. Vegagerðin svarar því einu að fjármagn skorti og ekkert verði aðhafst í bili.
Nú er verið að ljúka við annan áfanga á Dynjandisheiði. Þar með er komið bundið slitlag á um 24 af 31 kílómetra og því er einungis eftir þriðji áfangi, um sjö kílómetra kafli. Að því loknu verður loksins komið bundið slitlag milli sunnanverðra og norðanverðra Vestfjarða. Gera má ráð fyrir að kostnaður við þennan síðasta kafla sé um 1,5 milljarðar króna.
Árið 2020 samþykkti Alþingi samhljóða Samgönguáætlun 2020- 2034 þar sem gert var ráð fyrir að ljúka við vegagerð á heiðinni árið 2024. Um þetta var eining og þar fólst loforð til Vestfirðinga að vegi yfir Dynjandisheiði yrði loks komið í betra horf með bundnu slitlagi.
Það er með miklum ólíkindum að ekki eigi að standa við ákvörðun Alþingis og ljúka við þessa örfáu kílómetra sem eru eftir á Dynjandisheiði líkt og lofað var.
Innviðafélag Vestfjarða
Ísafirði 19. september 2024
Athugasemdir