Sómölskum mæðgum hefur nú verið vísað frá Íslandi eftir að hafa verið hér síðan 2023. Móðirin, Zahra Hussein er veik og í hjólastól og dóttirin, hin 17 ára Farah Mohamed talar orðið íslensku og stundaði nám í Flensborgarskóla í Hafnarfirði. Samkvæmt heimildum Mannlífs var hún handtekin á leið í próf í gærmorgun og færð ásamt móður sinni á hótel í Hafnarfirði.
Skátavinir, samnemendur og kennarar stúlkunnar mættu fyrir utan hótelið í gærkvöldi til að mótmæla brottvísuninni. Var mægðunum bannað að yfirgefa hótelherbergið og gat því Farah ekki kvatt vini sína. Söng hópurinn fyrir mæðgurnar fyrir utan hótelherbergið.
Samkvæmt Samstöðinni er mál mæðgnanna flókið en þær komu hingað til lands árið 2023 en áður hafði eiginmaður Zöhru og faðir Farah fengið vernd hér á landi. Áður höfðu mæðgurnar haft aðkomu á Kýpur og fengið þar mannúðarvernd. Í ljós kom síðan að eiginmaðurinn hafði ekki verið alveg heiðarlegur í sinni umsókn og því var dvalarleyfi hans rift og hann sendur úr landi. Samkvæmt Samstöðinni er síðast vitað af honum í Eþíópíu, þar sem hann var kvaddur í herinn en mæðgurnar hafa ekki heyrt frá honum í nokkra mánuði.
Eins og áður kemur fram er Zahra veik og bundin við hjólastól og reiðir sig aðgjörlega á dóttur sína í daglegum athöfnum en þeim var í morgum vísað úr landi.
Mannlíf heyrði í Jóni Sigurðssyni, lögmanni mæðgnanna, sem segir andlega líðan þeirra hræðilega.
„Þeim líður hræðilega. Stelpan er í algjöru áfalli. En nú er staðan sú að þeim hefur verið brottvísað, þær eru farnar úr landi. Þannig að allt sem ég hef verið að reyna að gera fyrir þær, opna þetta aftur og svona, það í raun fellur um sig því öllu verður vísað frá.“
Aðspurður hvort það sé þá engin von, neitar Jón því. „Nei, raunverulega ekki. Það eru engin sérstök úrræði til, til þess að berjast gegn þessu núna.“
Jón segir að dóttirin, Farah, hafi verið búin að koma sér vel inn í samfélagið á Íslandi.
„Hún var búin að aðlagast mjög vel, talaði fína íslensku og frábæra ensku og búin að mynda mjög góðar tengingar.“
Athugasemdir