Landris er hraðara nú í Svartsengi en í kjölfar síðustu eldgosa. Því virðast spár jarðvísindamanna um endalok eldgosahrinunnar á Sundhnúksgígaröðinni vera ótímabærar.
Í tilkynningu frá Veðurstofunni kemur fram að skýringin getur legið í því hversu mikið tæmdist úr kerfinu í kvikhlaupi 1. apríl, þar sem kvikugangur teygði sig langleiðina í áttina að Reykjanesbraut og hálfa leið til Hafnarfjarðar.
„Aflögunargögn sýna skýrt merki um að landris haldi áfram undir Svartsengi. Landris mælist nú hraðara en eftir síðustu eldgos. Það gæti skýrst af því hversu mikið rúmmál kviku fór úr kerfinu í þessum síðasta atburði,“ segir Veðurstofan.
Kvikugangurinn er sá stærsti sem myndast hefur frá 10. nóvember 2023, þegar miklar skemmdir urðu í Grindavík. Óttast var að gjósa myndi nærri Reykjanesbrautinni og Vogum í Vatnsleysuströnd, en kvikan var á eins til eins og hálfs kílómetra dýpi. Svo fór ekki, en atburðarásin heldur áfram.
„Hins vegar er enn of snemmt að segja til um áframhaldandi þróun á hraða kvikusöfnunarinnar. Reynsla frá fyrri atburðum sýnir þó að hraði kvikusöfnunar minnkar yfirleitt eftir því sem líður á kvikusöfnunartímabilið milli gosa. Bíða þarf í allavega viku, mögulega nokkrar vikur, til að segja til um hvort og þá hversu mikið hraði kvikusöfnunar mun breytast,“ segir Veðurstofan.
Smáskjálftavirkni er áfram við kvikuganginn, vestan og norðvestan við Keili, sem og skammt vestan við Kleifarvatn.
Veðurstofan mun því halda áfram nánu eftirliti.
„Miðað við þau gögn sem liggja fyrir er ljóst að innflæði kviku undir Svartsengi heldur áfram og er því atburðarásinni á Sundhnúksgígaröðinni ekki lokið. Á meðan kvikusöfnun heldur áfram undir Svartsengi eru líkur á endurteknum kvikuhlaupum og jafnvel eldgosum. Veðurstofan heldur áfram að vakta svæðið og meta mögulegar sviðsmyndir út frá nýjustu gögnum.“
Einn helsti eldfjallafræðingur Íslands, Ármann Höskuldsson, spáði því í febrúar að eldgosahrinunni færi að ljúka, þar sem hægst hefði á landrisinu. „Það er ekkert ólíklegt að þessi Sundhnúkssyrpa sé að koma að endalokum,“ sagði hann í samtali við Stöð 2. Nú virðist ný staða hafa opnast.
Athugasemdir