Útvarpsstjóri tók við undirskriftarlista þeirra sem vilja sniðganga Eurovision

Stefán Eiríks­son útvarps­stjóri RÚV tók á móti und­ir­skrift­ar­lista þeirra sem vilja að Rík­is­út­varpið dragi Ísland út Eurovision, verði Ísrael ekki vikið úr keppn­inni.

Fyrr í dag 12. maí afhenti lista­mað­ur­inn Lóa Hjálmtýs­dóttir Stefáni Eiríks­syni útvarps­stjóra RÚV und­ir­skrifta­lista sem hún er jafn­framt ábyrgð­ar­maður fyrir. Und­ir­skrifta­list­inn er sá listi sem í dag er með stærstan fjölda und­ir­skrifta á Íslandi en 5.600 manns hafa skrifað undir list­ann. Opið verður fyrir und­ir­skrift á list­ann til mið­nættis í kvöld. Þá afhenti Lóa útvarps­stjóra einnig texta­verk eftir hana.

Hér má sjá text­ann sem Lóa las fyrir Stefán við afhend­ingu und­ir­skrifta­list­ans:

„Við und­ir­rituð förum fram á að RÚV dragi Ísland úr Söngvakeppni evr­ópskra sjón­varps­stöðva, verði Ísrael ekki vísað úr keppni.

Um 5.600 manns skrifa undir þetta ákall. Hver und­ir­skrift á list­anum stendur því fyrir 10 manns­líf sem hafa glat­ast í hern­að­ar­að­gerðum Ísraels á Gaza.

Andstaða þjóð­ar­innar við þátt­töku Ísraels er mikil:

• Utan­rík­is­ráð­herra hefur lýst því yfir í fjöl­miðlum að henni þyki óeðli­legt að Ísrael fái að taka þátt.
• Fjöldi íslenskra lista­manna er á meðal rúm­lega sjö­tíu fyrrum Eurovision-kepp­enda sem hafa sent opið bréf til Sambands evr­ópskra sjón­varps­stöðva þar sem þeir krefj­ast þess að Ísrael verði úti­lokað frá keppn­inni.
• Félag tón­skálda og texta­höf­unda stendur enn fast við sína áskorun um að RÚV snið­gangi Eurovision ef Ísrael verður með.
• Annað árið í röð hefur FÁSES, Félag áhuga­fólks um Söngvakeppni evr­ópskra sjón­varps­stöðva, ekki haldið opin­bera við­burði í tengslum við Eurovision vegna þátt­töku Ísraels. Þá er mikið sagt.

Ísra­elski rík­is­fjöl­mið­ill­inn Kan hefur ítrekað birt efni sem lofar ofbeldi og eyði­legg­ingu hern­að­ar­að­gerð­anna og afmennskar Palest­ínu­menn. Þá fjár­magna ísra­elsk stjórn­völd mark­aðs­setn­ingu Eurovision-fram­laga Kan á sam­fé­lags­miðlum.

Þar sem Samband evr­ópskra sjón­varps­stöðva og Eurovision leggja áherslu á sjálf­stæði, óhlut­drægni og fjöl­breyti­leika, er það skylda allra sjón­varps­stöðva sem eiga aðild að sam­band­inu að standa vörð um þau gildi. Þegar einn aðili ógnar þessum gildum, ber öðrum að bregð­ast við.

Við sjáum því miður að orð duga skammt. Þrátt fyrir að rík­is­fjöl­miðlar fjög­urra landa – Írlands, Spánar, Slóveníu og Íslands – hafi ýmist kallað eftir umræðu innan sam­bands­ins um þátt­töku Kan eða lýst yfir and­stöðu gegn henni, hefur sam­bandið virt að vettugi þessar beiðnir eða dregið við­brögð á lang­inn, og stendur enn þétt við bakið á Kan.

Við hvetjum RÚV til að krefj­ast þess að sam­bandið taki á brotum Kan og tryggi að Eurovision haldi áfram að vera vett­vangur sem end­ur­speglar þau gildi sem keppnin stendur fyrir.

Hafa ber í huga að það er sterk póli­tísk afstaða að standa hjá og gera ekk­ert, að láta eins og við séum valda­laus and­spænis mann­úð­ar­krísu sem þess­ari. Við teljum það sið­ferð­is­lega skyldu okkar að gera allt sem í okkar valdi stendur til að stuðla að því að full­trúar Ísraels fái ekki að hvít­þvo sig með keppn­inni og deila sviði með öðrum kepp­endum. Við gerum þá kröfu að RÚV hlusti á ákall okkar og nýti dag­skrár­vald sitt í þágu friðar og mann­rétt­inda.

Tími orða­flaums er lið­inn. Tími aðgerða er runn­inn upp. Snið­göngum Eurovision.“