Kristrún Frostadóttir forsætisráðherra átti góðan fund með Mark Rutte, framkvæmdastjóra NATO.
Segir Kristrún að fram hafi komið á fundinum að algjör skilningur sé á stöðu og framlagi Íslands til sameiginlegra varna NATO-ríkja.
Þó að Atlantshafsbandalagið og aðildarríki þess bregðist hratt við vendingum í öryggis- og varnarmálum þá mun ekki verða nein eðlisbreyting á sambandi Íslands við NATO og bandalagsríki okkar.
„Við erum herlaust land – en við erum í lykilstöðu í Norður-Atlantshafinu. Og framlag okkar er mikils metið eins og verið hefur síðan Ísland gerðist eitt af 12 stofnríkjum NATO árið 1949. Ég vil að Ísland taki virkan þátt og veiti forystu í öryggis- og varnarmálum í okkar nærumhverfi,“ segir Kristrún og bætir þessu við:
„Við munum áfram vinna náið með NATO og auka viðbúnað og fjárfestingu í varnartengdum innviðum á næstu árum – sem geta einnig nýst í borgaralegum tilgangi. Það skiptir máli fyrir hagsmuni Íslands að við styrkjum getu okkar til að starfa með vinaþjóðum og bandalagsríkjum. Ríkisstjórnin er algjörlega einhuga um þetta. Sem birtist bæði í nýrri öryggis- og varnarmálastefnu sem unnið er að undir forystu utanríkisráðherra og í fjármálaáætlun ríkisstjórnarinnar til ársins 2030.“
Segir Kristrún að Rutte hafi lýst yfir ánægju sinni með afstöðu okkar og samstarfið við Ísland:
„Hann þakkaði sérstaklega fyrir stuðning við Úkraínu og aðkomu að eftirliti og æfingum bandalagsins á Norðurslóðum. Enda er ljóst að vægi Norðurslóða hefur aukist hratt á þessu sviði og við tökum ábyrgð okkar þar alvarlega.“
Kristrún segir að lokum að „framundan er leiðtogafundur NATO í Haag í lok júní. Fundurinn er vel undirbúinn og ég bind vonir við að hann verði árangursríkur og sögulegur fyrir Atlantshafsbandalagið.“
Athugasemdir