Í dagbók lögreglu frá því í gær og nótt er greint frá því að ökumaður hafi reynt stinga lögreglu af á stolinni bifreið og ók ökumaður yfir grasbala til að reyna að koma sér undan. Í framhaldinu reyndi hann að hlaupa undan lögreglu, en var handsamaður. Ökumaðurinn er grunaður um akstur undir áhrifum ávana- og fíkniefna, akstur sviptur ökuréttindum, vörslu fíkniefna, vopnalagabrot fyrir að bera vopn á almannafæri og nytjastuldur á ökutæki. Aðilinn var vistaður vegna málsins og málið til rannsóknar.
Þá var tilkynnt um leigubílstjóra í vandræðum með farþega sem voru í annarlegu ástandi. Málið var leyst á vettvangi að sögn lögreglu.
Einnig var tilkynnt um umferðaróhapp þar sem ökumaður er grunaður um ýmis umferðarlagabrot. Misnotkun á skráningarmerkjum, skjalafals, akstur sviptur ökuréttindum, tryggingar ekki í gildi og ekki búið að færa ökutækið til aðalskoðunar. Ökumaðurinn var fluttur á slysadeild til frekari skoðunar. Málið er til rannsóknar.
Skráningarmerki voru fjarlægð af fimm ökutækjum vegna þess að ökutækin hafa ekki verið færð til skoðunar á réttum tíma og/eða vanskila á tryggingum.
Ökumaður var stöðvaður þar sem hann ók um á negldum hjólbörðum. Við frekari skoðun kom í ljós að um erlendan ferðamann var að ræða og var hann á bílaleigubifreið sem hann hafi tekið á leigu fyrr um daginn.
Þá var tilkynnt um húsbrot í Árbænum og er málið í rannsókn samkvæmt lögreglu.
Athugasemdir