Smyril-Line lýsir miklum áhyggjum af framtíð Seyðisfjarðar verði ekki ráðist í jarðgangagerð, í umsögn fyrirtækisins um samgönguáætlun til Alþingi. Félagið tekur þó ekki afstöðu til þess hvar göngin eigi að liggja. Þetta kemur fram í frétt Austurfréttar.
Af 128 umsögnum sem bárust Alþingi um samgönguáætlun 2026–2040 fjalla 60 að einhverju leyti um Fjarðarheiðargöng. Flestar þeirra gagnrýna að framkvæmdunum sé frestað.
Smyril-Line bendir á að félagið hafi dregið úr þjónustu við Seyðisfjörð undanfarna mánuði vegna tíðra lokana á Fjarðarheiði. Heiðin lokist að meðaltali um 30 sinnum á ári, sem sé „verulegt öryggisvandamál“ og geri „ómögulegt að halda uppi heilsárssiglingum með ábyrgum hætti“.
Í umsögninni er jafnframt bent á að Norræna sé eina skipið sem sigli reglulega með farþega og farartæki milli Íslands og Evrópu og að Seyðisfjörður sé því, frá sjónarhóli alþjóðlegra samgangna, álíka mikilvægur og Keflavíkurflugvöllur.
Tillögur samgönguáætlunarinnar eru sagðar „illa ígrundaðar“ og að frestun Fjarðarheiðarganga og Fjarðaganga muni „óhjákvæmilega hafa alvarlegar afleiðingar fyrir Seyðisfjörð sem samfélag“.
Samgönguáætlunin er nú til umfjöllunar hjá umhverfis- og samgöngunefnd Alþingis.
Athugasemdir