Þorgerður Katrín Gunnarsdóttir utanríkisráðherra fundaði með utanríkisráðherra Japans, Toshimitsu Motegi, í Tókýó í dag en greint er frá þessu í tilkynningu frá stjórnvöldum.
Þar ræddu ráðherrarnir tvíhliða samskipti ríkjanna, viðskiptamál, öryggismál í Evrópu og málefni Úkraínu, norðurslóðamál og stöðuna á Indó-Kyrrahafssvæðinu.
Þorgerður Katrín er stödd í opinberri vinnuheimsókn í Japan. Hún fundaði einnig í dag með Takuo Komori, vararáðherra í utanríkisviðskipta-, efnahags og iðnaðarráðuneyti Japans. Þar voru viðskipti ríkjanna og efnahagslegt öryggi í víðu samhengi til umræðu.
„Japan er eitt helsta samstarfsríki okkar í Asíu, ekki síst á sviði viðskipta, en í ár verða bæði liðin 70 ár frá því að ríkin tóku upp formlegt stjórnmálasamband, og aldarfjórðungur frá gagnkvæmri stofnun sendiráða í Reykjavík og Tókýó,“ segir Þorgerður Katrín. „Japan gegnir lykilhlutverki í virðiskeðju alþjóðlegra framleiðslufyrirtækja og býr yfir gríðarlegri tækniþekkingu og sterkum innviðum. Við eigum í góðu sambandi við Japan og það er mikilvægt fyrir íslenska hagsmuni þar sem ríkið er eitt af fimm stærstu hagkerfum heims.“
Athugasemdir