Félagið Ísland-Palestína og BDS Ísland boða til opins kynningarfundar um sniðgöngu fyrir Palestínu á morgun, 19. febrúar. Fundurinn fer fram í Norræna húsinu og hefst klukkan 19:30.
Í tilkynningu frá skipuleggjendum kemur fram að sniðgönguhreyfingin á Íslandi hafi náð „ótrúlegum árangri“ á undanförnum árum. Þar er meðal annars bent á að Ísland hafi sniðgengið Eurovision, að nær engar matvöruverslanir vilji lengur kaupa inn ísraelskar vörur og að ísraelska kortafyrirtækið Rapyd hafi misst hundruði viðskiptavina.
Á fundinum munu fulltrúar BDS Ísland kynna starf hreyfingarinnar, svara spurningum fundargesta og útskýra hvernig almenningur geti tekið þátt í sniðgöngunni. BDS Ísland er hluti af alþjóðlegu hreyfingunni BDS Movement (Boycott, Divestment, Sanctions), sem á íslensku hefur verið þýtt sem sniðganga, fjárlosun og viðskiptaþvinganir.
Fram kemur í tilkynningunni að fundurinn sé opinn öllum og eru áhugasamir hvattir til að mæta.
Athugasemdir