Skjöl frá FBI sem tengjast ásökunum um kynferðisofbeldi gegn Donald Trump, og vantaði í fyrstu birtingu Epstein-skjalanna, hafa nú verið birt á netinu af bandaríska dómsmálaráðuneytinu, að því er fram kemur í frétt Sky News.
Birtinging kemur í kjölfar umfjöllunar bandarískra fjölmiðla, þar á meðal NBC News, samstarfsmiðils Sky News, sem greindu frá því að skjölin hefðu vantað.
Dómsmálaráðuneytið sagði að sum skjöl sem bent var á að vantaði hefðu ranglega verið merkt sem „tvítekning“ í gagnaskrá þess, sem varð til þess að almenningur sá þau ekki. Mistökin hafi nú verið leiðrétt.
Skjölin innihalda meðal annars samantektir og minnispunkta úr þremur aðskildum viðtölum sem FBI tók við konu sem sakar Jeffrey Epstein um kynferðisofbeldi gegn sér, og einnig núverandi forseta Bandaríkjanna um misnotkun.
Trump hefur hins vegar ítrekað neitað öllum ásökunum, og bæði hann og Hvíta húsið hafa sagt að Epstein-skjölin hafi í raun hreinsað hann af öllum grun.
Sky News hefur haft samband við Hvíta húsið og óskað eftir viðbrögðum við þeim fullyrðingum sem koma fram í nýbirtu skjölunum, en ekki enn fengið svör.
Í yfirlýsingu í gær sagði talskona forsetans, Karoline Leavitt, að ásakanirnar væru „algjörlega tilhæfulausar“ og „studdar engum trúverðugum sönnunargögnum“.
Dómsmálaráðuneytið hefur áður varað við því að í skjölunum séu einnig ósannaðar ásakanir um forsetann.
Hverjar eru ásakanirnar?
Konan, sem er frá Suður-Karólínu, gaf sig fram við lögreglu eftir að Epstein var handtekinn árið 2019.
Hún sakar auðkýfinginn og barnaníðinginn um að hafa beitt sig kynferðisofbeldi á Hilton Head Island í heimaríki hennar þegar hún var 13 ára gömul.
Samkvæmt samantekt úr viðtali FBI á atvikið að hafa átt sér stað árið 1984 eða þar um bil.
FBI tók fjögur eftirfylgniviðtöl við konuna árið 2019, dagana 24. júlí, 7. ágúst, 20. ágúst og 16. október.
Dagsetningarnar komu fram í gagnalista yfir sönnunargögn gegn Ghislaine Maxwell, fyrrverandi kærustu Epsteins og dæmdum samverkamanni hans, sem dómsmálaráðuneytið birti.
Í fyrstu birtingu Epstein-skjalanna, sem samanstanda af milljónum skjala, var þó aðeins birt samantekt FBI úr viðtalinu 24. júlí. Í þeirri samantekt er ekkert minnst á ásakanir gegn Trump.
Það eru hins vegar minnispunktar úr hinum þremur viðtölunum sem hafa nú verið birtir. Konan, sem er nafnlaus í skjölunum, sakar Epstein og nokkra samstarfsmenn hans um misnotkun, þar á meðal Trump að hennar sögn.
Í einu viðtali sagði konan að Epstein hefði farið með hana „annaðhvort til New York eða New Jersey“ og kynnt hana fyrir Trump. Hún sagði rannsakendum að hún hefði bitið Trump þegar hann reyndi að neyða hana til að hafa við hann munnmök.
Konan sagði að hún og fólk henni náið hefðu fengið hótunarsímtöl í gegnum árin þar sem þess var krafist að hún þegði, sem hún taldi tengjast Epstein.
Viðtölin stöðvuð
Skýrslur FBI benda að sögn til þess að fulltrúar hafi hætt að ræða við hana árið 2019. Í skýrslu um síðasta viðtal konunnar, sem tekið var í október 2019 á fyrra forsetatímabili Trumps, spurðu fulltrúar hvort hún væri fús til að veita frekari upplýsingar um Trump.
Í svari sínu skrifaði umboðsmaðurinn að hún „spurði hver tilgangurinn væri með því að veita upplýsingarnar á þessum tímapunkti í lífi hennar þegar miklar líkur væru á að ekkert yrði hægt að gera í málinu“.
„Fullyrðingarnar eru tilhæfulausar og rangar“
Dómsmálaráðuneytið hefur ítrekað fyrri viðvaranir sínar um að í Epstein-skjölunum sé einnig að finna rangar og óstaðfestar ásakanir.
Ráðuneytinu var gert að birta skjölin samkvæmt lögum um gagnsæi Epstein-skjalanna (Epstein Files Transparency Act), sem Trump undirritaði í lög seint á síðasta ári eftir þrýsting frá repúblikönum á Bandaríkjaþingi.
Þegar skjölin voru birt sagði ráðuneytið meðal annars:
„Þessi birting getur innihaldið fölsuð eða ranglega send inn myndbönd, skjöl eða myndir, þar sem allt efni sem almenningur sendi FBI var tekið með í birtinguna samkvæmt lögunum.“
„Sum skjölin innihalda ósannar og æsifréttakenndar ásakanir gegn Trump forseta sem voru sendar til FBI rétt fyrir forsetakosningarnar 2020. Til að taka af allan vafa eru þessar fullyrðingar tilhæfulausar og rangar. Hefðu þær haft nokkurn trúverðugleika hefðu þær án efa þegar verið notaðar gegn Trump forseta.“
Politico, bandaríska útgáfufyrirtækið sem fyrst greindi frá uppljóstrununum, sagði að Karoline Leavitt, fjölmiðlafulltrúi Hvíta hússins, hafi kallað ásakanir konunnar „algjörlega tilhæfulausar og studdar engum trúverðugum sönnunargögnum“.
Lögin sem kveða á um birtingu skjalanna heimila dómsmálaráðuneytinu að halda eftir gögnum sem innihalda upplýsingar um fórnarlömb, efni sem tengist kynferðisofbeldi gegn börnum eða efni sem gæti haft áhrif á virka rannsókn eða saksókn.
Þau banna þó að gögnum sé haldið leyndum „á grundvelli vandræðagangs, orðsporsskaða eða pólitískrar viðkvæmni, þar á meðal gagnvart embættismönnum, opinberum einstaklingum eða erlendum tignarmönnum“.
Enginn er nú til rannsóknar í Bandaríkjunum í tengslum við Epstein-skjölin.
Epstein-skjölin
Nýjar Epstein-myndir sagðar sýna Andrew prins með ungum konum
Clinton segist ekki hafa átt í kynferðislegum samskiptum við konuna í pottinum
Myndband
Yfirlýsing Bills Clinton í Epstein-yfirheyrslu
Volæði Windsor-fjölskyldunnar
Dómsmálaráðuneytið sakað um að leyna Epstein-gögnum sem varða Trump
Athugasemdir