Gunnar Smári Egilsson, ritstjóri Samstöðvarinnar, opnar sig um erfiða heilsu og bataferli í nýrri Facebook-færslu þar sem hann lýsir líðan sinni eftir innlagnir á hjartadeild.
„Ég sagði ykkur frá því um daginn þegar ég lagðist inn á hjartadeild tvívegis og fólk spyr mig því oft hvernig ég hafi það, sum um leið og þau óskuðu mér góðs sumars í gær. Skítt og lagó, svara ég, en ég verð góður í sumar. Þetta lýsir hugarástandi, ég hvorki veit né skil hvernig mér líður í dag en ég hef trú á að ég verði jafn góður aftur, ekki seinna en í sumar.“
Lýsir líkamlegri og andlegri vanlíðan
Gunnar Smári segir að veikindi hafi tekið mikinn toll, bæði líkamlega og andlega. Hann lýsir því hvernig orkan hafi horfið og líkamsstarfsemi breyst:
„Minn vandi er að ég kann ekki á mig lengur. Það hellist yfir mig mæði og þreyta án þess að ég sjái neitt samhengi. Ég sofna fimm sinnum yfir daginn, sitjandi í stól eða liggjandi í sófa.“
Hann segir jafnframt að hann hafi upplifað verulega skerðingu á orku:
„Ég er á 17% orku svaraði ég hjúkrunarfræðingi um daginn. Ég held ég sé kominn upp í 23%, svaraði ég daginn eftir.“
Flensa setti bataferli úr skorðum
Í færslunni kemur fram að flensa hafi gert ástandið verra og hrundið honum aftur í veikindi:
„Ég var kannski óheppinn, fékk flensu og þá gekk til baka sá árangurinn sem meðferðin hafði fært mér. Ég hrökk aftur úr takti og varð veikari en ég hef verið síðan ég fékk mislingana tólf ára.“
Hann lýsir einnig alvarlegum andlegum einkennum á meðan veikindin stóðu sem hæst:
„Í flensunni var ég með eins og vakandi óráð, fylgdist með huganum spinna upp einhverja þráhyggju um skaðlegt blóð og hvernig ég yrði að svara því, án þess að trúa þessu.“
Gunnar Smári segir að hann hafi misst styrk í rödd og tilfinningatjáningu:
„Ég hef misst aflið á bak við röddina. Hún er ekki bara veik heldur get ég ekki talað með eðlilegum áherslum. Ég á nóg með orðin, næ ekki að setja tilfinningu á bak við þau.“
Hann lýsir einnig ákveðinni firringu gagnvart eigin líkama:
„Húðin glansar stundum, ég horfi á hendurnar og þekki þær ekki, ekki frekar en lafði Macbeth.“
Í færslunni ræðir hann einnig um skort á skilningi á því hvernig líkamlegir sjúkdómar hafi áhrif á andlegt ástand:
„Ég hef ekkert sjúkdómsinnsæi, veit ekkert hvaða áhrif hjartabilun hefur á persónuleika fólks.“
Þrátt fyrir erfiðleikana segist hann bjartsýnn á bata:
„Ég skrifa þetta til að vita hvort andi minn sé með mér. Ég sakna hans og hlakka til að fá að lifa aftur fullu lífi. Það verður í sumar.“
Athugasemdir