Fjórum einstaklingum var bjargað úr Signuánni nærri París á fimmtudag eftir að rúta, sem ekið var af ökunema undir leiðsögn kennara, hafnaði í ánni eftir árekstur við kyrrstæða bifreið. Þetta kemur fram í upplýsingum frá frönskum yfirvöldum.
Atvikið átti sér stað í bænum Juvisy-sur-Orge, suðaustur af París. Samkvæmt saksóknurum fór rútan út af veginum og hafnaði í ánni við enn óljósar aðstæður.
„Ökumaðurinn og þrír aðrir einstaklingar voru um borð í rútunni. Öllum hefur verið bjargað,“ sagði í yfirlýsingu frá saksóknaraembættinu. Lögregla hefur hafið rannsókn á málinu.
Ekki hafa verið veittar upplýsingar um ástand þeirra sem bjargað var.
Fréttamaður AFP á vettvangi greindi frá því að rútan hefði sokkið að fullu í ána nærri brú á svæðinu. Kyrrstæða bifreiðin sem rútan rakst á endaði einnig í ánni.
Mikill viðbúnaður var á vettvangi og komu meðal annars að björgunaraðgerðum björgunarbátar, dróni og þyrlur.
Í tilkynningu frá héraðsyfirvöldum sagði að enn væri unnið að því að staðfesta umfang slyssins.
Þingkonan Claire Lejeune staðfesti að ökunemi hefði verið við stýrið þegar slysið varð.
Athugasemdir