Meira en helmingur Rússa, eða 56 prósent, vill að vestræn vörumerki snúi aftur til landsins eftir að mörg þeirra yfirgáfu það í kjölfar allsherjarinnrásarinnar í Úkraínu árið 2022. Þetta kemur fram í könnun sem rannsóknarsamtökin Gruppa 7/89 framkvæmdu í febrúar og mars 2026, að því er viðskiptablaðið Vedomosti greinir frá.
Samkvæmt niðurstöðunum vilja 41 prósent svarenda að vestrænir bílaframleiðendur snúi aftur. Þá vilja 28 prósent fá framleiðendur kvikmynda, tónlistar og tölvuleikja aftur, 27 prósent hugbúnaðarfyrirtæki, 25 prósent framleiðendur húsgagna og byggingarefna, 23 prósent matvæla- og drykkjarvöruframleiðendur og 22 prósent snyrtivörufyrirtæki.
Stuðningur við endurkomu vestrænna vörumerkja er mestur meðal fólks á aldrinum 18 til 29 ára, þar sem hann mælist 84 prósent, samanborið við 38 prósent meðal þeirra sem eru 60 ára og eldri. Um fjórðungur svarenda, eða 27 prósent, vill alls ekki að vestræn vörumerki snúi aftur, en 17 prósent sögðust óviss. Íbúar stórborga voru líklegri til að vilja vörumerkin aftur.
Eftir að innrásin í Úkraínu hófst árið 2022 yfirgáfu tugir stórra vestrænna fyrirtækja Rússland, þar á meðal framleiðendur fatnaðar, húsgagna og matvæla. Í kjölfarið fylgdi bylgja þjóðnýtingar þar sem eignir fyrirtækjanna voru fyrst færðar til ríkisstofnunarinnar Rosimushchestvo og síðar til viðskiptamanna sem taldir eru tengdir stjórnvöldum.
Flest erlendu fyrirtækin hafa haldið vörumerkjaréttindum sínum, en mörg hafa þó staðið frammi fyrir hættu á að missa þau. Enn sem komið er hafa vestræn fyrirtæki ekki í hyggju að snúa aftur til Rússlands, og yfirvöld þar í landi hafa sagt að þeim verði ekki veitt nein sérstök fríðindi á markaðnum þótt þau geri það.
Athugasemdir