Lögregla í ónefndu héraði í Rússlandi lagði fram kærur á hendur 13 ára dreng fyrir meintan „áróður fyrir LGBT“ og fyrir að sýna öfgatengd tákn, samkvæmt frétt óháða rússneska miðilsins Mediazona.
Blaðamenn ákváðu að birta hvorki nafn drengsins né hvaða hérað um ræðir til að vernda persónu hans.
Samkvæmt lögmanni drengsins hafði hann sýnt öðrum börnum eða foreldrum þeirra mynd eða myndskeið sem varð til þess að kvörtun var send til lögreglu.
„Hann var ekki að reyna að dreifa neinum áróðri, hann veit ekki einu sinni hvað það er. Brandari þróaðist í þetta. Barnið hugsaði ekki út í afleiðingarnar og nú hefur kerfið farið í gang,“ sagði lögmaðurinn.
Samkvæmt rússneskum lögum er aðeins hægt að leggja stjórnsýslukærur fram gegn einstaklingum sem hafa náð 16 ára aldri og því var málinu gegn drengnum formlega lokað. Lögregla sendi það þó áfram til nefndar sem fjallar um málefni ungmenna.
Nefndin veitti drengnum áminningu vegna kærunnar um „LGBT-áróður“.
Í hinu málinu, sem sneri að birtingu öfgatákna, taldi nefndin að drengurinn væri „móttækilegur fyrir leiðréttingu“ og ræddi möguleikann á að senda hann í heimavistarskóla fyrir afbrotamenn undir lögaldri.
Þá var hann einnig skráður sem ungur afbrotamaður hjá yfirvöldum.
Lögmaður drengsins segir hann vera fyrirmyndarnemanda sem taki þátt í námskeppnum og hafi unnið til verðlauna í skapandi greinum.
Hann hefur nú áfrýjað ákvörðunum ungmennanefndarinnar fyrir dómstólum.
Athugasemdir