Sjálfstæðismenn og óháðir í Bolungarvík greina frá því að Jón Guðni Pétursson skipstjóri sé fallinn frá en gera þeir það í færslu á samfélagsmiðlum sem birt var í fyrradag. Þar er hans getið sem kærs félaga, góðs vinar og áhrifamikils manns í samfélaginu.
Jón stundaði sjómennsku af miklum krafti frá unga aldri og var um árabil fengsæll skipstjóri. Hann stýrði meðal annars Guðnýju ÍS, sem gerð var út frá Ísafirði og síðar Bolungarvík, auk Þorláks ÍS frá Bolungarvík. Framlag hans til atvinnulífs í Bolungarvík sagt hafa verið ómetanlegt.
Þar kemur einnig fram að Jón naut mikillar virðingar meðal bæjarbúa. Hann skipaði heiðurssæti D-lista Sjálfstæðismanna og óháðra í sveitarstjórnarkosningum í Bolungarvík árin 2014, 2018 og 2022 og tók virkan þátt í kosningastarfi flokksins.
Jón er jafnframt sagður hafa notið vinsælda og virðingar hvarvetna og að nærvera hans hafi haft jákvæð áhrif á fólk í kringum hann. Þá er honum lýst sem sannfærðum hægrimanni sem hafi staðið fast á sínum skoðunum án þess að ganga fram af offorsi.
Athugasemdir