Sigurður Helgi Pálmason, þingmaður Flokks fólksins, hefur lagt fram frumvarp til breytinga á lögum um mannanöfn sem miðar að því að takmarka möguleika dæmdra afbrotamanna á að breyta nafni sínu. Frumvarpið var lagt fram á Alþingi á laugardag og nýtur stuðnings fimmtán þingmanna úr bæði stjórnarmeirihluta og stjórnarandstöðu.
Samkvæmt frumvarpinu yrði stjórnvöldum heimilt að hafna beiðnum um nafnbreytingar frá einstaklingum sem hafa hlotið óskilorðsbundinn fangelsisdóm fyrir alvarleg brot og verið dæmdir til þriggja ára fangelsisvistar eða lengur.
Markmið breytinganna er að koma í veg fyrir að einstaklingar sem hafa gerst sekir um alvarleg afbrot geti falið fortíð sína með því að taka upp nýtt nafn. Í frumvarpinu er jafnframt lögð áhersla á að hagsmunir almennings og brotaþola skuli hafa aukið vægi við mat á slíkum umsóknum.
Í greinargerð með frumvarpinu er vísað til dæma þar sem einstaklingar hafa breytt um nafn eftir afplánun, auk þess sem bent er á að slíkt geti haft áhrif á stöðu og réttindi brotaþola.
Athugasemdir