Héraðsdómur Reykjaness hefur dæmt karlmann í 30 daga skilorðsbundið fangelsi fyrir umsáturseinelti gagnvart fyrrverandi sambýliskonu sinni. Manninum var jafnframt gert að greiða brotaþola 400 þúsund krónur í miskabætur.
Málið laut að háttsemi mannsins á tímabilinu frá október til nóvember 2024 í kjölfar sambúðarslita þeirra. Samkvæmt dómnum hringdi hann ítrekað í konuna, sendi henni skilaboð og tölvupósta, tók mynd af bifreið hennar og sendi henni, auk þess sem hann reyndi ítrekað að hafa samband við hana þrátt fyrir skýran vilja hennar um hið gagnstæða. Þá var honum einnig gefið að sök að hafa fylgst með ferðum hennar og komið að henni á opinberum stöðum.
Dómurinn taldi sannað að háttsemin hefði verið til þess fallin að valda konunni ótta og kvíða. Við mat sitt vísaði dómurinn meðal annars til þess að maðurinn hefði skrifað undir yfirlýsingu hjá lögreglu þar sem hann skuldbatt sig til að hafa ekkert samband við konuna í sex mánuði. Þrátt fyrir það hélt hann áfram samskiptatilraunum og nálgaðist hana ítrekað.
Ákærði var hins vegar sýknaður af ákæru um líkamsárás sem átti að hafa átt sér stað á heimili konunnar í október 2024. Taldi dómurinn að ekki hefði verið fram komin nægjanlega sterk sönnun til að sakfella hann fyrir þann ákærulið.
Við ákvörðun refsingar var meðal annars litið til þess að maðurinn hafði ekki áður hlotið refsingu. Fangelsisrefsingin var því skilorðsbundin til tveggja ára. Auk miskabóta var honum gert að greiða hluta sakarkostnaðar málsins.
Athugasemdir